रामचन्द्रले बोलाए सत्तारुढ संयन्त्रको पहिलो बैठक

काठमाडौं । सत्तारूढ गठबन्धनमा आबद्ध दलहरूको समन्वय समितिको पहिलो बैठक आज बस्दैछ । सिंहदरबारस्थित प्रधानमन्त्री कार्यालयमा बस्ने बैठकमा समसामयिक राजनीति, आसन्न राष्ट्रियसभा निर्वाचनलगायतका विषयमा छलफल हुने बताइएको छ । बैठकको समय निर्धारणका लागि समितिका सदस्यहरू आपसी संवादमा छन् ।

उच्चस्तरीय राजनीतिक संयन्त्रका रूपमा रहेको समन्वय समितिको पहिलो बैठकमा समितिको कार्यविधिलगायतका विषयमा पनि छलफल हुनेछ । समन्वय समितिको सचिवालय बनाउने विषयमा पनि बैठकले निर्णय लिनेछ ।

समितिका संयोजक एवं नेपाली कांग्रेसका बरिष्ठ नेता रामचन्द्र पौडेलले सत्तारुढ ५ दलबीच संविधान र लोकतन्त्र रक्षाका लागि भएको सहकार्य निरन्तर राख्न समितिले समन्वय गर्ने बताए । समिति गठन गरेकै दिन आज पहिलो बैठक गर्ने सहमति भएअनुसार बैठक बोलाइएको पौडेलले बताए ।

समन्वय समितिमा नेपाली कांग्रेसबाट पौडेल र पूर्वमहामन्त्री कृष्णप्रसाद सिटौला, नेकपा माओवादी केन्द्रबाट अध्यक्ष पुष्पकमल दाहाल र नेता नारायणकाजी श्रेष्ठ, नेकपा समाजवादीबाट अध्यक्ष माधवकुमार नेपाल, जसपाबाट उपेन्द्र यादव तथा राष्ट्रिय जनमोर्चाबाट चित्रबहादुर केसी र दुर्गा पौडेल छन् । सरकारका तर्फबाट सञ्चारमन्त्री ज्ञानेन्द्रबहादुर कार्की पनि समितिमा रहेका छन् ।