जर्मुराउँदै रंगमंच : सास अभियानले थाल्यो गाउँगाउँमा नाटक मञ्चन

काठमाडौं । कोरोना महामारीले सिथिल भएको रंगमंच जुर्मुराउन थालेको छ । रंगमंचलाई चलायमान बनाउने उद्देश्यले नाट्य अभियान सासले गाउँगाउँमा नाटक मंचन थालेको छ । अभियानको पहिलो चरणअन्तर्गत ललितपुर, भक्तपुर र काभ्रेमा तीनवटा नाटकलाई मंचन गरिएको छ ।

ती ठाउँमा क्रमशः भाउजुको ब्यथा, नाङ्गो बस्ती र आरुवारिको फूल लघुनाटक प्रदर्शन गरियो । सास अभियानले अब दोस्रो चरण अन्तर्गत धादिङ, चितवन, मकवानपुर, सिन्धुली र दोलखामा पनि नाटक मंचन गर्ने भएको छ । जसको लागि अहिले काठमाडौंमा रिहर्सल भैरहेको छ ।

अभियान संचालक एवं निर्देशक ठण्डबहादुर अधिकारी सासको रुपमा छन् भने हुङ्गकर्मी प्रल्हाद खरेलले उनलाई सहयोग गरिरहेका छन। नेपाली समाजलाइ रंगमञ्चसँग जोड्न सास अभियान थालिएको निर्देशक अधिकारीले बताए ।

वरिष्ठ लेखक, निर्देशक कलाकार मोहन निरौला र निर्देशक बिश्वदीप घिमिरेको प्रमुख सल्लाहमा शुरु भएको नाट्य अभियान चौथो चरणसम्म चल्ने र भिन्न स्थानहरुमा यसलाई मंचन गरिने सासको तयारी छ ।

मञ्चन गरिएका नाटकमा समाजमा एकल महिलाहरुले भोग्नुपरेको पीडालाई समेटिएको छ भने उनीहरुको संघर्षलाई पनि चित्रण गरिएको छ । सास उपनामले परिचित निर्देशक अधिकारी लामो समयको यूरोप र अमेरिका बसाईपछि नेपाली रङ्गमंच र फिल्ममा काम गर्ने तयारीसहित फर्किएका हुन् ।

सासको नाट्य अभियानमा रङ्गकर्मी बिश्वदीप घिमिरे, प्रल्हाद खरेल, मन्जु गिरी, अशोक पहारी, प्रिया भुजेल, शशीशेखर बुढाथोकी, पूर्णिमा थामी, शान्ती भट्टराई लगायत सहभागी छन् ।