विपन्न परिवारलाई वितरण गर्न स्थानीय तहमा अर्थ मन्त्रालयले पठायो ५ अर्ब

काठमाडौं । अतिविपन्न नागरिकका लागि वितरण गर्ने भनिएको १० हजार नगद हस्तान्तरणका लागि अर्थमन्त्रालयले बजेट स्वीकृति दिएको छ । ५ लाख परिवारलाई १० हजारका दरले हस्तान्तरण गर्ने गरी ५ अर्ब रुपैयाँ स्थानीय तहमा पठाउन स्वीकृति प्रदान गरिएको अर्थ सचिव मधुकुमार मरासिनीले नेपाल प्रेसलाई बताए ।

‘विपन्न नागरिकलाई नगद हस्तान्तरण गर्नका लागि अर्थमन्त्रालले ५ अर्ब रुपैयाँ स्वीकृती दिएको छ । अब स्थानीय तहले कार्यविधिमा उल्लेख भएनुसारका विपन्न नागरिकलाई रकम वितरण गर्ने बाटो खुलेको छ,’ मरासिनीले बताए ।

चालु आर्थिक वर्षको बजेट मार्फत सरकारले कोभिड- १९ का कारण रोजगारी गुमाएका, अनौपचारिक क्षेत्रमा काम श्रमिक एवं अतिविपन्न नागरिकका ५ लाख परिवारलाई एक पटकका लागि १० हजारका दरले वितरण कार्यक्रम ल्याएको थियो ।

सोही कार्यक्रमलाई निरन्तरता दिनका लागि मन्त्रिपरिषद्र्ले ‘कोभिड १९ को महामारीबाट प्रभावित अतिविपन्न परिवार नगद हस्तान्तरण कार्यविधि २०७८’ निर्माण गरिसकेको छ ।

यस योजनामा सहभागिता हुनका लागि रोजगारी पूर्णरूपमा गुमाएको र अर्को रोजगारी प्राप्त गर्न नसकी बेरोजगार भएको असंगठित मजदुर वा कामदार हुनुपर्ने कार्यविधिमा उल्लेख गरिएको छ ।

यसैगरी खुला सडक, फुटपाथमा वा चौरमा खर्पन, नाङ्गलो, डोको आदिमा समान बेच्ने अतिविपन्न व्यवसायी, दैनिक ज्याला-मजदुरी गर्ने भरिया, कृषि मजदुर, गोठाला, खेतला, ज्यालदारी श्रमिक, रिक्सा चालक, ठेलागाडा मजदुर, सार्वजनिक यातायात मजदुर, पर्यटन, भरियाले सो रकम प्राप्त गर्न सक्ने व्यवस्था कार्यविधि मार्फत गरेको छ ।