आफ्नै पिएले पनि छोडे भीमसेनदासको साथ

काठमाडौं । नेपाली कांग्रेसको १४ औं महाधिवेशन अन्तर्गत तल्लो तहको अधिवेशन जारी रहँदा गुट परिवर्तनको लहरै चलेको छ ।

काठमाडौंमा पूर्व रक्षामन्त्री एवं पूर्व जिल्ला सभापति भीमसेनदास प्रधानका २ जना स्वकीय सचिवले नै प्रधानको साथ छाडेका छन् । प्रधान कांग्रेसमा तेस्रो धार भनिने सिटौला समूहको प्रभावशाली नेता हुन् ।

प्रधान रक्षामन्त्री हुँदा स्वकीय सचिव रहेका ईन्द्रमान महर्जन र जगन्नाथ धिमाल पूर्व महामन्त्री प्रकाशमान सिंहको समूहमा लागेका छन् । पूर्व रक्षामन्त्री प्रधानसँग लामो समयदेखि सहकार्य गरेका काठमाडौं क्षेत्र नम्बर ६ कै नेता महर्जन सिंह पक्षबाट महाधिवेशन प्रतिनिधि निर्वाचित भएका छन् । काठमाडौंमा पूर्व महामन्त्री सिंह र केन्द्रीय सदस्य गगन थापाबीच तालमेल भएपछि प्रधान पक्षका धेरै नेताले गुट फेरेका हुन् ।

प्रधानको स्वकीय सचिव रहेका रिमालले पनि गुट परिवर्तन गर्दै काठमाडौं क्षेत्र नम्बर ३ बाट महाधिवेशन प्रतिनिधि बनेका छन् । काठमाडौंका अधिकांश क्षेत्रमा सभापति शेरबहादुर देउवा र पूर्व महामन्त्री कृष्ण सिटौला नेतृत्वको टिमबीच सहकार्य भएको छ । काठमाडौंका १० मध्ये ८ क्षेत्रमा प्रकाशमान–गगन टिमले जितेको छ भने देउवा र सिटौला पक्षले १–१ क्षेत्रमा सभापति जितेका छन् ।