बारका पदाधिकारीसँग प्रधानमन्त्रीले भने- समस्या बुझेको छु, छिट्टै निष्कर्षमा पुग्नुपर्छ

काठमाडौं । प्रधानमन्त्री शेरबहादुर देउवाले न्यायालयमा देखिएको समस्या समाधानका लागि सबै पक्षसँग छलफल गरेर छिट्टै निष्कर्षमा पुग्ने बताएका छन् ।

नेपाल बार एशोसिएसनका पदाधिकारीहरूसँग आज बालुवाटारमा भएको छलफलमा प्रधानमन्त्री देउवाले न्यायालयबारे सत्तारुढ गठबन्धनभित्र छलफल गरेर चाँडै निष्कर्ष दिने बताए ।

बैठकको सुरूमा बारका पदाधिकारीले न्यायालयभित्रको अवस्था, जारी आन्दोलन र प्रधान्यायाधीशको बहिर्गमनको आवश्यकताबारे जानकारी गराएका थिए । जवाफमा प्रधानमन्त्री देउवाले न्यायालयबारे जारी आन्दोलनबारे आफू अपडेट रहेको भन्दै छिट्टै निकास खोज्ने बताए ।

‘मैले न्यायालयमा देखिएको समस्यालाई बुझेको छु । सबैसँग छलफल गरेर छिट्टै निष्कर्षमा पुग्नुपर्छ । गठबन्धनमा छ्टि्टै छलफल गर्छु’, देउवालाई उद्धृत गर्दै बैठकमा सहभागी एक कानून व्यवसायीले भने ।

छलफलको क्रममा बारका पदाधिकारीहरूले राजीनामा दिन अस्वीकार गरेका प्रधान्यायाधीश राणालाई महाभियोग लगाउनुपर्ने सुझाव दिएका थिए ।

बार पदाधिकारीसँगको छलफललगत्तै प्रधानमन्त्री देउवा नेकपा एमालेको महाधिवेशनको उद्घाटन सत्रमा सहभागी हुन चितवन प्रस्थान गरेका छन् ।