मुकुन्देले भेटे इन्दिरा ! विहे गर्न चन्दा आह्वान

काठमाडौं । आफूलाई ‘दार्शनिक’ का रुपमा चिनाउने ‘भाइरलम्यान’ मुकुन्द घिमिरे उर्फ मुकुन्देले जोडी भेटेका छन् । झापाकी इन्दिरा संग्रौलासँग उनको लगनगाँठो कसिन लागेको हो ।

मुकुन्देले इन्दिरासँग आफ्नो ‘सरप्राइज ईंगेजमेन्ट’ भएको भन्दै सामाजिक सञ्जालमा हिजो तस्विर पोष्ट गरेका थिए । त्यससँगै उनी प्रशस्त बधाइ खाइरहेका छन् । उनको विवाहलाई लिएर नानाथरि ट्रोल पनि बनिरहेका छन् । विगतमा उनले आफूलाई ‘उँची उँची, सलक्क परेका छोराछोरी पाउने’ केटी चाहिएको भन्दै अन्तरवार्ता दिने गरेका थिए ।

संयोगले मुकुन्दले ‘इन्दिरा’ नाम गरेकी दुलही भेट्टाएका छन् । ‘मुकुन्द–इन्दिरा’ बालकृष्ण समको चर्चित नाटक हो । मुकुन्देले यसलाई ‘आठौं आश्चर्य’ बताएका छन् ।

मुकुन्द र इन्दिराको विवाह यही मंसिरमै हुने भएको छ । ईंगेजमेन्टपछि सार्वजनिक भएको एक अन्तरवर्तामा मुकुन्देले ‘मंसिर २७ गते घिमिरे परिवारमा संग्रौलाबाकी छोरी भित्र्याउने मोटामोटी सहमति भएको’ जानकारी दिएका छन् ।

उमेरले ४० काटेपछि मुकुन्देले जोडी भेटेका हुन् । उनीहरुको प्रेम विवाह हुन लागेको हो । प्रेम प्रस्ताव मुकुन्दले राखेका थिए ।

उमेरले ३० काटेकी इन्दिराले त्रिभुवन विश्वविद्यालयबाट इकोनोमिक्समा मास्टर्ससम्मको अध्ययन गरेकी छन् । उनी चितवनमा रोजगारी गर्छिन् । मुकुन्देको विचार र निर्दोषिताबाट आफू आकर्षित भएको इन्दिराले बताएकी छन् ।

ढिला गरी विवाह गर्न लागेको बारे मुकुन्देले भनेका छन्, ‘हतारमा विहे गरेर फुर्सदमा पछुताउने भन्दा फस्र्ट एन्ड लास्ट भन्ने हिसाबले गर्न लागेको हो । समाजले मेरो विहेलाई अप्रत्याशित सुखद घटनाको रुपमा लिएको छ ।’

यसैबीच मुकुन्देले आफ्नो विहेका लागि आर्थिक संकलन सुरु गरेका छन् । उनले सामाजिक सञ्जालमा स्टाटस लेख्दै ‘देशविदेशमा अभियान चलाएर विहेको खर्च जुटाइदिने र छोराको शीर उठाइदिने’ अपेक्षा गरेका छन् ।

उनले आफ्नो इसेवा अकाउन्ट र बैंक अकाउन्टसमेत सार्वजनिक गरेका छन् । तर, कमेन्टहरु हेर्दा उनको विवाहका लागि खासै सहयोग उठ्ला जस्तो देखिँदैन ।