कमल थापाको अर्को स्टाटसः यसपाली त मनै फाट्यो

काठमाडौं । राष्ट्रिय प्रजातन्त्र पार्टीको अध्यक्षमा पराजित भएदेखि कमल थापा पूरै सामाजिक सञ्जालमा सक्रिय भएका छन् । फेसबुक र ट्विटरमा उनका आधिकारिक पेजहरुबाट एकपछि अर्को उत्तेजक र भावुक पोष्टहरु भइरहेको छ ।

पछिल्लो पोष्टमा चाहिँ थापा भावुक बनेका छन् । आफ्नो अन्तरमनभित्रको मान्यतामाथि नै गम्भीर प्रश्न चिन्ह खडा भएका टिप्पणीसहित उनले राजेन्द्र थापाको चर्चित गीत ‘पोहोर साल खुशी फाट्दा जतन गरी मनले टालेँ।।’ का पंतिहरु सेयर गरेका छन् ।

थापाले आज पार्टीको मतगणना सकिएलगत्तै पूर्वराजा ज्ञानेन्द्र शाहका विरुद्ध सामाजिक सञ्जालमा आक्रोशित टिप्पणी गरेका थिए । त्यसपछि फेरि पूर्वयुवराज्ञी हिमानी शाहको नक्कली ट्विटर अकाउन्टबाट आएको ट्विटलाई कटाक्ष गरेका थिए ।

थापाका धाराप्रवाह स्टाटसहरुले उनलाई पराजयको चोट सहत गाह्रो परिरहेको प्रतित हुन्छ ।

मेरो अन्तर्मन भित्र मेरो मान्यता माथि गंभीर प्रश्न चिन्ह खडा भएको अहिलेको अवस्थामा कवि राजेन्द्र थापाको यो कविता सम्झन मन लाग्यो
“पोहोर साल खुशी फाट्दा
जतन गरि मनले टाले
त्यहि साल माया फाट्यो
त्यसलाई पनि मनले टाले
यसपाली त मनै फाट्यो
केले सिउने केले टाल्ने हो?”

— Kamal Thapa (@KTnepal) December 5, 2021