स्वास्थ्य सतर्कता अपनाएर विवाहपञ्चमीमा सहभागी हुन मुख्यमन्त्रीको आग्रह

जनकपुरधाम । प्रदेश २ का मुख्यमन्त्री लालबाबु राउतले कोरोना महामारीको जोखिम कायम रहेकाले स्वास्थ्य सतर्कता अपनाएर विवाहपञ्चमी महोत्सवमा सहभागी हुन आग्रह गरेका छन् ।

मुख्यमन्त्री राउतले विवाहपञ्चमीको अवसरमा आज जारी गरेको शुभकामना सन्देशमार्फत स्वास्थ्य सतर्कता अपनाउन श्रद्धालुसँग अपिल गरेका हुन् । त्रेता युगमा भगवान् राम-सीताको विवाह भएको स्मरणमा प्रत्येक वर्ष मनाइने साताव्यापी विवाहपञ्चमी महोत्सवको अवसरमा  राउतले शुभकामना व्यक्त गरेका छन् ।

यसवर्ष विवाहपञ्चमी मंसिर २२ गते परेको छ । सो दिन प्रदेशभर सार्वजनिक बिदा दिएको पनि मुख्यमन्त्री राउतद्वारा जारी सन्देशमा उल्लेख छ । जनकपुरधाम उपमहानगरपालिकाले भने शैक्षिक संस्था ३ दिन बन्द गर्ने निर्णय यसअघि नै गरिसकेको छ ।

विवाहपञ्चमीमा नेपाल र भारतबाट भक्तजनको भीड लाग्छ । अहिले जनकपुरधाममा श्रद्धालु आउनेक्रम जारी छ ।