सहमहामन्त्री लड्ने घोषणा गरेका अमरेश महाधिवेशन प्रतिनिधिमै पराजित

काठमाडौं । नेपाली कांग्रेसको १४ औं महाधिवेशनमा सहमहामन्त्री लड्ने घोषणा गरेका सांसद अमरेशकुमार सिंह महाधिवेशन प्रतिनिधिमै पराजित भएका छन् ।

सर्लाही क्षेत्र नम्बर ४ को मंगलबार सम्पन्न अधिवेशनमा महाधिवेशन प्रतिनिधिको प्रत्याशी रहेका सिंह पराजित भएका हुन् । २ सय ४८ मत ल्याएपनि सिंहको जितका लागि पर्याप्त हुन सकेन ।

सो क्षेत्रमा सिंहको टिममा रहेका अन्य कसैले पनि महाधिवेशन प्रतिनिधि जित्न सकेनन् । सिंहले लामो समयदेखि आफू मधेशी आरक्षणतर्फ सहमहामन्त्रीको उम्मेदवार बन्ने बताउँदै आएका थिए ।

सो क्षेत्रका प्रदेश सांसदद्वय उपेन्द्र कुशवाह र वीरेन्द्र सिंह नेता सिंह विरुद्ध आक्रमक रुपमा प्रस्तुत भएका थिए । प्रदेश सांसद सिंह प्रदेश २ का मन्त्री पनि हुन् । केहिदिन अगाडी अधिवेशनकै विषयमा विवाद चर्केपछि मन्त्री सिंहका अंगरक्षकले गोली नै चलाएका थिए ।

लामो समयदेखि विवादित बनेको सो क्षेत्रमा सांसद सिंह र प्रदेश २ का मन्त्री वीरेन्द्र सिंहबीच प्रतिस्पर्धा रहँदै आएको थियो ।