संस्थापनइतरको भेला : प्रकाशमान र शेखरको पक्षमा एक-एकजना, अरुले कसैको नाम लिएनन्

काठमाडौं । संस्थापनइतर पक्षबाट कसलाई सभापति उम्मेदवार बनाउने भनेर राय लिन आयोजित भेलामा दुई जिल्ला सभापतिबाहेक अरु कसैले पनि व्यक्तिको नाम लिन अश्वीकार गरेका छन् । बत्तिसपुतलीस्थित अनुपम फुडल्याण्डमा आयोजित भेलामा कुनै एउटाको नाम लिन फ्लोर खुला गर्ने कुरा राजनीतिक नहुने भन्दै सहभागीले अश्वीकार गरेका हुन् ।

जिल्लाका निवर्तमान र नवनिर्वाचित सभापति तथा प्रदेशका निर्वाचित सभापति र सभापतिको प्रत्यासी बनेका नेतासहित केन्द्रीय सदस्यहरूको भेलामा केहीबेर बसेर रामचन्द्र पौडेल निस्किएका थिए भने सभापतिका दाबेदार अन्य नेता सहभागी थिएनन् ।

भेलामा मोरङका सभापति डिगबहादुर लिम्बुले आफू शेरवहादुर देउवा गुट छाडेर आएको भन्द्यै जिल्लाको नेता भएका कारण शेखर कोइरालाको पक्ष लिने बताएका थिए । त्यस्तै काठमाडौंका सभापति कृष्ण सबुज बानियाले पनि काठमाडौंकै भएका कारण प्रकाशमान सिंहको नाम लिने बताएका थिए ।

अन्य सहभागीले भने कुनै एक नेताका नाम नलिने भन्दै यो विषय चार नेता रामचन्द्र,शेखर,शशांक र प्रकाशमान बसेर सहमतिमा टुंग्याउनुपर्ने बताएका छन् । आजै चार नेता बसेर सभापतिको उम्मेदवार तय गर्दैछन् । यसअघि नै शशांकले रामचन्द्रलाई समर्थन गरेका छन् ।