देउवा पक्षका आकांक्षीको व्यवस्थापन गर्न ९ नेतालाई जिम्मा

काठमाडौं । नेपाली कांग्रेसको आगामी महाधिवेशनमा संस्थापन समूहबाट विभिन्न पदका आकांक्षीहरू धेरै भएपछि व्यवस्थापनका लागि ९ नेताहरूलाई जिम्मेवारी तोकिएको छ । आज बसेको संस्थापन पक्षको वैठकले सात प्रदेशमा संस्थापन पक्षबाट साझा उम्मेदवार तय गर्ने उद्देश्यले उनीहरुलाई जिम्मेवारी दिइएको हो ।

सुदूरपश्चिममा एनपी साउद र रमेश लेखक, कर्णालीमा पूर्णबहादुर खड्का र जीवनबहादुर शाहीले आकांक्षी मिलाउने जिम्मा पाएका छन् । यस्तै, लुम्बिनीमा बालकृष्ण खाण, गण्डकीमा गोपालमान श्रेष्ठ, बाग्मतिमा प्रकाशशरण महत, प्रदेश २ मा रमेश रिजाल तथा प्रदेश १ मा ज्ञानेन्द्रबहादुर कार्कीले जिम्मेवारी पाएका छन् ।

कांग्रेस महाधिवेशन शुक्रबारबाट सुरू हुँदैछ । महाधिवेशनमा संस्थापन पक्षबाट शेरबहादुर देउवा अध्यक्षमा लड्दैछन् भने संस्थापनइतर समूह साझा उम्मेदवार तय गर्ने कसरतमा छ ।