सिरहाको त्रिशुली नदीमाथि बन्ने भयो पुल, स्थानीय खुसी

जनकपुरधाम । सिरहाको बरियारपट्टी गाउँपालिका– ३ स्थित त्रिशुली नदीमा पुल निर्माण हुने भएको छ । प्रदेश २ को भौतिक पूर्वाधार विकास मन्त्राललयले पुल निर्माण कार्य अगाडि बढाएको हो ।

प्रदेश २ का भूमि व्यवस्था, कृषि तथा सहकारी मन्त्री विजयकुमार यादव र बरियापट्टी गाउँपालिकाका प्रमुख सन्तोष महतोले संयुक्त रुपमा शुक्रबार पुलको शिलान्यास गरेका हुन् । मापदण्डअनुसार तोकिएको समयमै पुल निर्माण गर्न मन्त्री यादवले ठेकेदार कम्पनीलाई निर्देशन दिए ।

पुल निर्माणको ठेक्का रसुवा रोषण जेभी जनकपुरले लिएको छ । सो कम्पनीले ६ करोड ९१ लाख ८६ हजार २३६ रुपैयाँ ५४ पैसामा पुल निर्माणको ठेक्का पाएको हो । २० महिनाभित्र निर्माण सक्ने सम्झौता उक्त कम्पनीले गरेको छ ।

बलुवा र श्रीपुर जोड्ने त्रिशुली नदीमा पुल नहुँदा बर्षायाममा बाटो अवरुद्ध हुँदै आएको थियो । नदीमा बाढी आएपछि जोखिम मालेर आवातजावत गर्ने स्थानीय पुल निर्माण हुने भएपछि खुशी भएका छन् ।