बले र प्रिज्मा ब्रेकअपको साइड-इफेक्ट : ‘भद्रगोल’ बन्यो युट्युवमा एक करोड पटक हेरिने पहिलो नेपाली सिरियल !

काठमाडौं । हाँस्य टेलिश्रृंखला भद्रगोल युट्युवमा एक करोड पटक हेरिने पहिलो नेपाली सिरियल बनेको छ । यसअघि फिल्म र म्युजिक भिडिओलाई मात्र करोडभन्दा पटक हेर्ने अंकगणित थियो । करोड क्लबमा भद्रगोल प्रवेश गरेसँगै युट्युवका दर्शकमाझ पनि सिरियलको क्रेज बढेको मूल्यांकन गर्न सकिन्छ ।

तर, नेपालमा अन्य सिरियल पनि युट्युवमा रिलिज भएपनि तीमध्ये कसैले यो मानक हासिल गर्न सकेका थिएनन् । आफू अभिनित सिरियललाई करोड पटक हेरिएपछि अभिनेता कुमार कट्टेल जिग्री ब्रोले दर्शकलाई धन्यवाद दिएका छन् । उनले विज्ञप्ति जारी गर्दै दर्शकको साथ र मायाको कारण युट्युवमा यो कीर्तिमान बन्न सकेको बताए । भद्रगोललाई मिडिया हबले युट्युवमा रिलिज गरेको हो ।

दुई वर्षअघि सार्वजनिक ‘भद्रगोल’को एपिसोड २०२ लाई युट्युबमा १ करोड बढी पटक हेरिएको छ । सिरियलका एकजना कलाकारमध्येका सागर लम्साल बले र उक्त एपिसोडमा गेस्ट रोलको रुपमा देखिएकी प्रिज्मा खतिवडाको ब्रेकअपको चर्चाको कारण यो एपिसोडले पछिल्लो समय भ्यूज पाएको हो । यो एसिपोडलाई मार्च १५, २०१९ मा युट्युवमा अपलोड गरिएको थियो । पछिल्लो समय बले र प्रिज्माको ब्रेकअपले सामाजिक संजाल तातिरहेको छ ।

सोही कारण यसले पछिल्लो समय भ्यूज बढी पाएको अनुमान गरिएको छ ।

हाल ‘सक्किगो नि’को लेखन एवं निर्देशन गर्दै आएका कुमार कट्टेल ‘जिग्री’ र अर्जुन घिमिरे ‘पाँडे’ले सो समयमा ‘भद्रगोल’ लेखन एवं निर्देशन गर्दै आएका थिए । कुमार र अर्जुनसँगै ‘भद्रगोल’मा अभिनय गर्दै आएका अधिकांश कलाकार अहिले ‘सक्किगो नि’मा देखिँदै आएका छन् ।

कुमार र अर्जुनको लेखन तथा निर्देशन रहँदै आएको ‘सक्किगो नि’लाई पनि दर्शकले रुचाएका छन् । यो टेलिसिरियलमा कुमार र अर्जुनसँगै सागर लम्साल, हरिश निरौला, गोविन्द कोइराला, कमलमणि नेपाल, दीपक आचार्य, मधुसुदन पाठक, प्रियाना आचार्य, सीतादेवी घिमिरे, रश्मी पाण्डे, सञ्जिता पाण्डे, कविराज भाम लगायतको अभिनय रहँदै आएको छ ।

यो टेलिसिरियल हिमालय टीभीबाट प्रसारण हुँदै आएको छ । हालसम्म यो टेलिसिरियल ४६ भागसम्म प्रसारण भइसकेको छ ।