प्रदेश २ः लोसपाको विरोधपछि १५ मिनेट प्रदेशसभा बैठक स्थगित

जनकपुरधाम । प्रदेश २ को प्रदेशसभा बैठक लोकतान्त्रिक समाजवादी पार्टी (लोसपा)ले अवरुद्ध गरेको छ । सरकारले ल्याएको दुई विश्वविद्यालयसम्बन्धी अध्यादेश टेबल गर्न लागेकाले लोसपाका सांसदहरुले बैठक अवरुद्ध पारेका हुन् ।

सभामुख सरोजकुमार यादवले कृषि विश्वविद्यालयसम्बन्धी अध्यादेश टेबल गर्न सामाजिक विकास मन्त्री नवलकिशोर साहलाई रोस्टममा बोलाएपछि लोसपाका सांसदहरुले उठेका विरोध जनाएका थिए । लोसपाका सचेतक प्रमेश्वर साहले सदन छलेर अध्यादेश ल्याएको र उद्देश्य स्पष्ट नरहेकाले टेबल गर्न नदिने बताए ।

सभामुख यादवले पटक–पटक बस्न गरेको आग्रह लोसपा सांसदहरुले नमानेपछि १५ मिनेटका लागि बैठक स्थगित गरिएको छ । संसद अवरुद्ध गर्नुअगाडि लोसपा संसदीय दलका नेता जीतेन्द्र सोनलले पनि प्रदेशसभा छलेर ल्याएको अध्यादेश फिर्ता लिन माग गरेका थिए ।