एनआरएनए विवाद समाधान गर्न उच्चस्तरीय समिति गठन

काठमाडौं । कूल आचार्य पक्षले चुनावमा भाग नलिने चेतावनी दिएपछि गैरआवासीय नेपाली संघ (एनआरएनए)ले सहमतिको प्रयास थालेको छ ।

अध्यक्ष कुमार पन्तले संस्थाभित्रको विवादलाई सहमति र संवादका आधारमा समाधान गर्न चार सदस्यीय उच्चस्तरीय समिति गठन गरेका छन् ।

समिति सदस्यहरुमा संघका केन्द्रिय सल्लाहकार विश्व आदर्श पण्डित, डा. यादव पण्डित, सचिव गौरी जोशी र प्रवक्ता डीबी क्षेत्री छन् ।

अन्तर्राष्ट्रिय कार्यकारी सचिवालयका सदस्यलाई पत्र लेख्दै उनले सर्वसम्मत समाधान खोज्न संरक्षक, सल्लाहकार, अग्रज, आइसीसीका सदस्यहरुसँग छलफल र सल्लाह थालेको बताएका छन् ।

तर, अहिलेको निर्वाचन कार्यतालिका स्थगित गरिएको बारेमा उनले केही बताएका छैनन् । दोस्रोपटकको निर्वाचन पुस ११ र १२ गते तय गरिएको छ ।

नेपाल प्रेससँग कुरा गर्दै अध्यक्षका प्रत्यासी कूल आचार्यले सर्वसम्मत प्रयास भए आफूहरु चुनावमा सहभागी हुने बताए । सहमति खोज्न संस्थापनले पहल थाल्नुलाई उनले स्वागतयोग्य भएको बताए ।

केही एनसीसीको चुनाव र मतदाता नामावालीलाई लिएर एनआरएनएमा विवाद देखिएको छ । आचार्य पक्ष विवादलाई समाधान गरेर मात्र चुनावमा जानुपर्ने अडानमा छ ।

अध्यक्ष पन्तले चाहिँ घोषित मितिमै चुनाब गराउन प्रयास भैरहेको बताए ।