नेपाली तन्नेरीलाई अमेरिकी कलाकारले सिकाए हिपहप संगीत (तस्बिरहरु)

काठमाडौं । कलाको माध्यमबाट लोकतन्त्र र संस्कृति प्रवद्र्धन गर्ने उद्देश्यले अमेरिकी दूतावासले नेक्स्ट लेभल कार्यशाला सम्पन्न गरेको छ । दुई साता लामो वर्कसपमा नेपालका ७० जना किशोरकिशोरीले चर्चित अमेरिकी हिपहप कलाकारद्वारा विशेष भर्चुअल कक्षा लिए ।

महाराजगञ्जस्थित शिवपुरी कलेजमा दुई साता चलेको विशेष कार्यशालाको अन्तिम दिन शुक्रबार सहभागीले प्रस्तुति दिए । सहभागीलाई हिपहप संगीतका चारवटा तत्वहरु डीजे, र्‍याप, बिट मेकिङ र डान्स शैली सिकाइएको थियो ।

न्यूयोर्कका दृश्य कलाकार एडम, बीब्वाइ एवं डीजे लिन रक, डान्सर-कोरियोग्राफर एवं निर्मात्री लिसा एंजेलकेन, अभियन्ता तथा कलाकार वान बिलो, भिडिओगाफ्रर जुआन गोमेज र पुएर्तो रिकोकी एमसी, शैक्षिक अभियन्ता, अभिनेत्री एवं लेखिका पिंकी रिङले भर्चुअल माध्यममार्फत हिपहप संगीत सिकाएका थिए ।

आवेदनमार्फत छानिएका मुलुकका विभिन्न थलोबाट राजधानी आइपुगेका ७० जना तन्नेरीले अमेरिकी कलाकारबाट संगीतको हिपहप विधाबारे ज्ञान हासिल गरेका थिए । दुई साता चलेको विशेष कार्यशालाको पहिलो अध्यायमा भर्चुअल अभिमुखीकरण कला र दोस्रो अध्यायमा हाइव्रिड शैलीमा संगीत सिकाइएको थियो ।

अमेरिकी दूतावासको प्रस्तुतिमा नेक्स्ट लेभल नेपाल र नेपाल हिपहप फाउन्डेसनले कार्यक्रम आयोजना गरेका थिए । कार्यशालाको अन्तिम दिन शिवपुरी कलेज प्रागंणमा प्रशिक्षार्थीले बी–ब्वाइ तथा गर्ल, डीजेइङ, गायन लगायतका कला प्रस्तुत गरे ।

सो अवसरमा बोल्दै अमेरिकी दूतावासकी सांस्कृतिक मामिला अधिकृत सारा जेसमिन नाइटले नेपालको लोकतन्त्र प्रवद्र्धनमा नेक्स्ट लेभल कार्यक्रम सहायकसिद्ध हुने बताइन् ।

‘नेपालजस्तो लोकतान्त्रिक मुलुकको लोकतन्त्र तथा संस्कृति प्रवद्र्धनमा कलाको योगदान महत्वपूर्ण हुन्छ र हामीले युवाहरुको क्षमतामार्फत त्यसलाई प्रवद्र्धन गर्न चाहेका हौं’ नाइटले भनिन् ।

नेपाल हिपहप फाउन्डेसनका संस्थापक निर्देशक दिपेश थापाले यस्तो खाले कार्यक्रम नेपालमा पहिलो पटक भएको बताए । ‘यसले नेपालमा हिपहप संगीतलाई प्रवद्र्धन गर्न महत्वपूर्ण भूमिका खेलेको छ’ उनले भने, ‘पछिल्लो समय नेपाली तन्नेरीमा देखिएको यस्तो क्रेजको आफ्नै खाले अर्थ छ ।’

कार्यशालामा सहभागी २८ वर्षिया प्रशिक्षार्थी जेनिशा महर्जनले पछिल्लो समय नेपालका मानिसले हिपहपको अर्थ बुझ्न थालेको र नेपालमा यसको भविष्य सुन्दर रहेको बताइन् । सानैदेखि हिपहपप्रति आफ्नो रुचि रहेपनि नेक्स्ट लेभल वर्कसपले क्षमता तिखार्नु फाइदा पुगेको उनले सुनाइन् ।

अमेरिकी स्टेट डिपार्टमेन्ट, नर्थ क्यारोलिना विश्वविद्यालय र मेरिडियन इन्टरनेसनल सेन्टरसको संयुक्त पहलमा नेक्स्ट लेभल कार्यक्रम आयोजना भैरहेको छ । वैविध्य समाजमा अन्तरसांस्कृतिक सिर्जना आदानप्रदान गर्ने र लोकतन्त्र प्रवद्र्धन गर्न हिपहप संगीत र नृत्यको प्रयोग गर्ने उद्देश्य राखिएको छ ।

सन् २०१४ देखि नेक्स्ट लेभलले ६ वटा महादेशका ३५ भन्दा बढी मुलुकमा सांस्कृतिक कार्यक्रम आयोजना गर्दै आइरहेको छ । सन् २०२१ र २०२२ मा नेपालसहित संयुक्त अरब इमिरेट्स, बारबाडोस, ताइवान, इक्वेडर, पोल्यान्ड, लाओस, युक्रेन, हाइटी र घानामा नेक्स्ट लेभलले कार्यक्रम आयोजना गर्दैछ । सोही कार्यक्रमअन्तर्गत नेपालमा कार्यशाला संचालन गरिएको हो ।

अमेरिकी दूतावासले नेपालको सांस्कृतिक प्रवद्र्धनको लागि यसअघि मासिकरुपमा फिल्म प्रदर्शन कार्यक्रम पनि आयोजना गर्दै आइरहेको थियो ।