पिछडिएको क्षेत्रबाट कांग्रेस केन्द्रीय सदस्यमा देउवा प्यानलका सिंह विजयी
नेपाल प्रेस
२०७८ पुष ३ गते ८:०४
काठमाडौं । नेपाली कांग्रेसको पिछडिएको क्षेत्रतर्फबाट केन्द्रीय सदस्यमा सभापति शेरबहादुर देउवा प्यानलका अर्जुनबहादुर सिंह विजयी भएका छन् । सिंहले दुई हजार ६७७ मत ल्याए भने उनका प्रतिस्पर्धी दीपकजङ्ग शाहीले दुई हजार ५६ मत मात्रै प्राप्त गरेको कांग्रेसको निर्वाचन समितिले जनाएको छ ।
विजयी सिंह पूर्वपरराष्ट्र राज्यमन्त्री तथा कोरियाका लागि पूर्वराजदूत हुन् ।
त्यस्तै नेपाली कांग्रेसको केन्द्रीय सदस्यमा शेरबहादुर देउवा समूहकी चित्रलेखा यादव सिन निर्वाचित भएकी छन् । उनले शेखर कोइराला समूहकी गिता चौधरीलाई पराजित गरेकी हुन् । चित्रलेखाले २७३१ मत प्राप्त गर्दा चौधरीले १८८५ मत प्राप्त गरिन् ।
नेपाली कांग्रेसको १४ औं महाधिवेशन अन्तरगत नेतृत्व चयनका लागि भएको मतदानको मतगणना जारी छ । पदाधिकारीको मतगणना सकिएपछि आज १० बजेदेखि ३५ खुल्ला केन्द्रीय सदस्यको मतगणना हुने कांग्रेसले जनाएको छ ।
कांग्रेसको निर्वाचन समिति संयोजक गोपालकृष्ण घिमिरेले एक सूचना जारी गर्दै मतगणनाका लागि उम्मेदवार वा एकजना प्रतिनिधि मगतणनास्थल सानेपामा पठाइदिन पनि आग्रह गरेका छन् ।
कांग्रेसमा सभापतिसहित १३ पदाधिकारीको मतमणना सकिइसकेको छ । सभापति, उपसभापति, महामन्त्री र सहमहामन्त्रीको मतगाण्ना सकिएको छ ।
नेपाल प्रेस
प्रकाशित: २०७८ पुष ३ गते ८:०४
प्रतिक्रिया
सम्बन्धित खवर
