सेन्सरबिनै युएईमा फिल्म रिलिज हुने : नेपाली निर्माता उत्साही

दुबई । संयुक्त अरब इमिरेट्सले आफूलाई उदार देखाउन सोमबार अर्को एक बोल्ड निर्णय गरेको छ । अब जाँचपास बिनै बिदेशी फिल्मलाई सिनेमा घरमा रिलिज गरिने भएको छ । त्यहाँको मिडिया नियामक निकायले सोमबारदेखि नै यो निर्णय लागू भएको जनाएको छ । अब त्यहाँको सरकारले २१ वर्षभन्दा बढी उमेरका नागरिकको लागि नयाँ वर्गीकरण गर्ने भएको छ ।

मिडिया विवरणका अनुसार सेन्सर बिनै फिल्म प्रदर्शन गर्दा विदेशी पर्यटकलाई आकर्षित गर्न सकिने युएई सरकारको उद्देश्य छ । अहिलेसम्म एउटा कमिटीले नियमितरुपमै फिल्म सेन्सर गर्दै आइरहेको थियो । इस्लाम विरोध विषयवस्तुलाई हटाउने गरिन्थ्यो ।

अब बिना कुनै काँटछाँट बिना फिल्मलाई हलमा रिलिज गर्न पाइने भएको छ । सामाजिक संजालको पोस्टमार्फत मिडिया नियामक निकायले यस्तो जानकारी दिएको हो ।

युएई सरकारको एक आँकडाअनुसार त्यहाँ विदेशी फिल्मका १० जना दर्शकमध्ये ९ जना विदेशी हुन्छन् । युएईले पछिल्लो समय विदेशीलाई आकर्षित गर्न केही नियमहरु लागू गर्न थालेको छ । हालै त्यहाँ साढे चार दिनको वर्किङ पिरियड लागू गरिएको छ ।

युएई नेपाली फिल्मको ठूलो बजार समेत हो । कोभिड महामारीअघि नेपाली फिल्म निर्माताले युएईका ठूला बजार दुबई र अबुधाबीबाटै राम्रो रकम संकलन गर्थे । नेपाल चलचित्र प्राविधिक संघले दुबईमा नेफ्टा फिल्म अवार्ड पनि आयोजना गरेको थियो ।

युएई सरकारको उक्त निर्णयले नेपाली फिल्मको बजारीकरण र प्रदर्शनमा सजिलो हुने चलचित्र प्राविधिक संघका अध्यक्ष पुष्कर लामाले बताए । ‘महामारीअघि नेफ्टा अवार्डले त्यहाँ राम्रो बजार सिर्जना गरेको थियो’ लामाले नेपाल प्रेसलाई भने, ‘युएई सरकारकै निर्णयले अब नेपाली फिल्म बजारलाई सहज पहुँच दिने आशा गरिएको छ ।’

महामारीअघि खाडी मुलुकहरुमा फिल्म प्रदर्शन गर्नको लागि संयुक्तरुपमा प्रदर्शन अधिकार विक्री गर्ने अभ्यास पनि थियो । तर, कोभिड–१९ सुरु भएपछि त्यो अभ्यास रोकिएको छ ।