कांग्रेस अधिवेशनः झोला वितरणमा झेला भएको गुनासो

जनकपुरधाम । नेपाली कांग्रेस प्रदेश २ अधिवेशनमा झोला वितरणमा विवाद भएको छ । झोला वितरणमा अधिवेशन आयोजकले लापरबाही गरेको आरोप प्रतिनिधीहरूले लगाएका हुन् ।

प्रदेश अधिवेशनको आयोजक धनुषा जिल्ला कमिटीले सबै प्रतिनिधिका लागि झोलाको व्यवस्था गरेको थियो । प्रदेश अधिवेशनमा १ हजार ९८० प्रतिनिधि छन् । तर, सिरहा, पर्सा र सर्लाहीका प्रतिनिधिहरूले झोला पाएनन् ।

प्रतिनिधिसँग इन्ट्री फि दुई हजार लिए पनि झोला नदिएको पर्साका प्रतिनिधि जयमंगल कापरले गुनासो गरे । उनले भने, ‘कसैले २/३ वटासम्म झोला पायो, हामीलाई एउटै दिएनन् । झोला वितरणमा आयोजक मनपरी गरेछन् ।’

उनले कतिपय प्रतिनिधिले अहिलेसम्म कार्डसमेत नपाएको बताए । आयोजकले प्रतिनिधिका लागि कुनै कुराको व्यवस्थापन नगरेको पनि उनले सुनाए ।

स्रोतका अनुसार धनुषाका प्रतिनिधिहरूले २/३ वटासम्म झोला लिएका छन् । काँग्रेस धनुषा सभापति महेश शंकर गिरीले २०/२५ जना प्रतिनिधीले २/३ वटासम्म झोला लिएर गएपछि केहिले नपाएको स्वीकारे । यो कसको लापरबाही भन्ने विषयमा उनले केही बोलेनन् ।

जनकपुरधामको गोपाल धर्मशालामा मतदानको तयारी गरिए पनि अहिलेसम्म निर्वाचन सुरू भएको छैन । ७४ सदस्यीय प्रदेश कमिटीका लागि १८० जना चुनावी मैदानमा छन् ।