कांग्रेस मतगणना अन्तिम चरणमा, अब दुई क्लष्टरको मात्रै बाँकी

काठमाडौं । नेपाली कांग्रेसको १४ औं महाधिवेशन अन्तर्गत अब २ क्लष्टरको मात्रै परिणाम आउन बाँकी छ ।

केन्द्रीय निर्वाचन समितिका अनुसार आदिवासी जनजाति तर्फ खुला र महिला सदस्यको नतिजा आउन बाँकी छ । त्यस्तै खसआर्य तर्फपनि खुला र महिला सदस्यको नतिजा आउन बाँकी छ । दुवै क्लष्टरका चारवटै समूहको मतगणना जारी रहेको छ ।

आदिवासी जनजाति केन्द्रीय सदस्य खुलातर्फ ८ जना निर्वाचित हुनेछन् । हालसम्म ३ हजार २ सय मत गन्दा चिनकाजी श्रेष्ठले अग्रता लिएका छन् । उनीबाहेक उमेश श्रेष्ठ, बहादुरसिंह लामा, टेकबहादुर गुरुङ, दिलमान पाख्रिन, आङगेलु शेर्पा, तारामान गुरुङ र टेकप्रसाद गुरुङ शीर्ष आठभित्र समेटिएका छन् ।

आठमध्ये ७ जना सभापति शेरबहादुर देउवा नेतृत्वको प्यानलका हुन् । आदिवासी जनजाति महिलातर्फ सीता गुरुङले अग्रता लिइरहेकी छिन् । आदिवासी जनजाति महिलातर्फ ७ जना निर्वाचित हुने व्यवस्था छ ।

खस आर्य खुलातर्फ हालसम्म करिब ३ हजार ९ सय मत गणना गरिएको छ । ७ जना विजयी हुने यस क्लष्टरमा हालसम्म केशवकुमार बुढाथोकीले अग्रता लिएका छन् ।

उनीबाहेक गोविन्दबहादुर शाह, मधु आचार्य, भीम पराजुली, श्यामकुमार घिमिरे, नारायणबहादुर कार्की र गेहेन्द्र गिरी शीर्ष ७ भित्र रहेका छन् । उनीरुमध्ये मधु आचार्य मात्रै कोइराला प्यानलका हुन् ।

त्यस्तै खस आर्य महिलातर्फ ६ जना निर्वाचित हुनेछन् । जारी मतगणनामा अहिलेसम्म मञ्जु खाण, नानू बास्तोला, प्रतिमा गौतम, चम्पादेवी खड्का, कान्तिका सेजुवाल र विद्यादेवी तिमल्सिनाले शीर्ष ६ भित्र स्थान बनाएका छन् । ६ जनामध्ये प्रतिमा बाहेक सबै देउवा प्यानलका हुन् ।