झलनाथको दाबी- ‘सुखी नेपाली, समृद्ध नेपाल’ मैले अघि सारेको नारा (भिडिओ)

काठमाडौं । नेकपा (एकीकृत समाजवादी) का सम्मानित नेता झलनाथ खनालले ‘सुखी नेपाली, समृद्ध नेपाल’को नारा आफूले अघि सारेको बताएका छन् । विहीबार राजधानीमा आयोजित पुस्तक विमोचन कार्यक्रममा एमालेको नवौं महाविधेशनमा आफूले सम्पूर्ण नेपालीको सपनाका रूपमा सो नारा अघि सारेको उनको दाबी छ ।

‘सुखी नेपाली, समृद्ध नेपाल मैले नेकपा (एमाले) को नवौं महाधिवेशनमा अगाडि सारेको नारा हो,’ खनालले भने, ‘कम्युनिष्ट आन्दोलन त्यति बेला ठ्याक्क ६५ वर्षमा पुगेको थियो । अब ३५ वर्षमा सय वर्षमा पुग्छ । यो अवधिमा हामीले नेपालमा कम्युनिष्ट आन्दोलनका सामु के लक्ष्य राख्ने त भन्दा सुखी नेपाली समृद्ध नेपाल हुनुपर्छ भनेर अगाडि सारिएको थियो ।’

तत्कालीन केपी शर्मा ओलीको सरकारले पनि त्यसलाई आफ्नो नाराका रूपमा अघि बढाएपछि चर्चामा आएको थियो । खनालले समाजवादमा पुगेर मात्रै यो नारा पूरा हुने बताए । ‘त्यो अहिले पनि म भन्छु- हाम्रो सपना हो। यो पूरा गर्न सम्पूर्ण जनता एकताबद्ध भएर अगाडि बढनुपर्छ । तर, जबसम्म समाजवाद ल्याउन सकिँदैन, त्यो सपना पूरा हुँदैन ।’

उनले पार्टी निर्माणको चार महिनामै आफूहरूले राष्ट्रव्यापी पार्टी बनाइसकेको समेत बताए। पालिका र वडातहसम्म अहिले समिति निर्माण भइरहेको खनालको भनाइ छ ।