विप्लव, कञ्चन र सुर्दशन कमरेड अब समय आयो ध्रुविकरणमा ढिलो नगरौ : प्रचण्ड

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेत्रविक्रम चन्द ‘विप्लव’ नेतृत्वको नेकपालाई ध्रविकरणमा सहभागि हुन आग्रह गरेका छन् । महाधिवेशनको अघिल्लो दिन प्रेस सेन्टर नेपाल र क्रान्तिकारी पत्रकार संगठनविचको एकता घोषणा समारोहलाई सम्बोधन गर्दै प्रचण्डले यस्तो आग्रह गरेका हुन् ।

सम्बोधन गर्दै प्रचण्डले भने, ‘कमरेड विप्लव, धर्मेन्द्र बास्तोला ‘कञ्चन’ र हेमन्तप्रकाश ओली ‘सुदर्शन’ यहाँहरु तिनै जनलाई आग्रह छ । अब समय आयो । ढिलो नगरौ । चाडै एक ढिक्का भएर अघि बढौ ।’ विप्लव नेतृत्वको प्रमुख तीन नेताको नाम लिए पनि दोस्रो बरियतामा रहेका पार्टी प्रवक्ता खड्गबहादुर विश्वकर्मा ‘प्रकाण्ड’को नाम भने उच्चारण गरेनन् ।

उनले विप्लव लगायतका नेतासँग पार्टी एकताको विषयमा छलफल चलिरहेको बताउदैँ सवै माओवादी र तिनका नेतालाई मुल घरमा नै केन्द्रित भएर फेरी पार्टी आन्दोलनलाई राष्ट्र र जनतालाई नयाँ नेतृत्व गर्नुपर्ने बेला आएको बताए ।

उनले थप्दै भने, ‘अरु माओवादी विचारधार बोकेका पार्टी र नेताहरुलाई पनि म आग्रह गर्न चाहान्छु । अहिले सबैको माग नै पार्टी एकता र ध्रुविकरण हो । प्रतिगमनविरुद्धको आन्दोलन पनि हाम्रै पार्टीको नेतृत्वमा भएकाले त्यो गर्न जरुरी देखिएको छ ।’

माओवादी ध्रविकरणमा सबैलाई आग्रह गरेका प्रचण्डले पार्टीको महाधिवेशनबाट पार्टीका र पार्टीको नेतृत्वको पनि समिक्षा गरिने घोषणा गरे । उनले भने, ‘महाधिवेशनमा सबैभन्दा पहिले म आफैबाट आत्मसमिक्षा सुरु गर्दैछु । पार्टी भित्रका र पार्टी नेतृत्व भित्र देखिएका कमी कमजोरीको मैले नैतिक रुपमा जिम्मेवारी त लिनै पर्छ, ठोस रुपमा पनि के कहाँ कमजोरी भयो त्यो आत्मसमिक्षा मैले गर्नुपर्छ । पार्टी भित्रको आत्मसमिक्षाले सबैलाई एक ठाउँमा ल्याउन ठुलो भूमिका निर्वाह गर्ने मैले अपेक्षा गरेको छु ।’

उनले पार्टीकै कमजोरीले पार्टीमा समस्या भएको स्विकार गर्दै अब त्यस्ता कमजोरीको समिक्षा गरेर त्यस्ता गल्ति नदोहोर्याउने गरी अघि बढ्नुपर्नेमा जोड दिए । उनले भने, ‘कहि न कहि रुपमा पार्टीले कमजोरी गरेकै कारण यस्ता समस्या आए । अरुलाई दोष दिएर के त मैले के त पार्टीले उम्किन मिल्दैन । पार्टीको महाधिवेशनमा अहिलेसम्म भए गरेका कमीकमजोरीको समिक्षा गरेर जानुपर्छ । कहाँनिर बिचारमा, कहा बिधि र कहाँ प्रक्रिायमा त्रुटी गर्यौ त्यसको आत्मसमिक्षा गर्ने र एक पटक सबैलाई एक ढिक्का बनाउने हो ।’