विवेकशील साझाले भन्यो – पृथ्वी जयन्तीलाई ‘नेपाल दिवस’का रुपमा मनाऊँ

काठमाडौं । विवेकशील साझा पार्टीले राष्ट्रिय एकता दिवसलाई नेपाल दिवसका रुपमा मनाउन आग्रह गरेको छ ।

पृथ्वी जयन्तीका अवसरमा मनाईने एकता दिवसलाई साझाले नेपाल दिवसका रुपमा मनाउन आग्रह गरेको हो ।

विवेकशील साझाले एक विज्ञप्तीजारी गर्दै विश्वका अधिकांश देहले महत्वका साथ निश्चित दिनमा राष्ट्रिय दिवस मनाउने गरेको उल्लेख गर्दै नेपालको हकमा पृथ्वी जयन्तीको दिनलाई नेपालका दिवसका रुपमा मनाउनु उपयुक्त हुने बताएको छ ।

यस्तै सो दिन देशभरी सार्वजनिक विदा दिन पनि विवेकशीले सरकारसँग माग गरेको छ ।

अनावश्यक रुपमा अन्य विदाहरु दिएर राष्ट्रिय एकता दिवसमा दिइने विदा कटौती गर्नु अन्त्यतै खेदजनक भएको विवेकशील साझाको ठहर छ ।

प्रेस विज्ञप्ति: राष्ट्रिय एकता दिवसलाई ‘नेपाल दिवस’ का रूपमा मनाऊँ

अर्को साता नेपाल राज्यका निर्माता पृथ्वीनारायण शाहको जन्म जयन्ती तथा राष्ट्रिय एकता दिवस आउँदै छ। सो सन्दर्भ पारेर विवेकशील साझा पार्टी नेपाल सरकारसँग निम्न मागहरू गर्दछ:

१) पृथ्वी जयन्ती तथा राष्ट्रिय एकता दिवसलाई ‘नेपाल दिवस (Nepal Day)’ का रूपमा मनाइयोस्। संसारका अधिकांश देशहरूमा विशिष्ट महत्त्वको निश्चित दिनमा राष्ट्रिय दिवस मनाइने गर्दछ, जुन स्थायी हुन्छ। नेपालका हकमा हाम्रो निश्चित राष्ट्रिय दिवस छैन। पृथ्वी जयन्ती तथा राष्ट्रिय एकता दिवस नै ‘नेपाल दिवस’ का लागि सबैभन्दा उपयुक्त दिन हुनसक्छ भन्ने हाम्रो धारणा हो।

२) संसारका कुनै पनि एकीकरणकर्ता विवादरहित हुँदैनन् र छैनन्। तर तिनै विवादलाई लिएर पृथ्वीनारायण शाहको अवमूल्यन गर्नु उपयुक्त हुँदैन। उनको दूरदर्शिता र दिव्य उपदेश शान्त, स्वाभिमानपूर्ण, सार्वभौमसत्ता सम्पन्न र संवृद्ध नेपाल निर्माणका लागि आज पनि उत्तिकै सान्दर्भिक छ।

३) राष्ट्रिय एकता दिवसका दिन सार्वजनिक बिदा दिइयोस् भनी हामीले विगतमा गरेको मागलाई पुनः दोहोर्‍याउँछौ। अनावश्यक रूपमा अनेकौँ बिदाहरू दिएर राष्ट्रिय एकता दिवसमा दिइने सार्वजनिक बिदा कटौती गर्नु अत्यन्तै खेदजनक विषय हो।

४। त्यसै गरी, नेपाली रुपैयाँमा पृथ्वीनारायण शाहको तस्बिर अङ्कित गरियोस् र हरेक सरकारी कार्यालयमा ससम्मान उनको तस्बिर राख्न निर्देशन दिइयोस् भन्ने माग पनि दोहोर्‍याउन चाहन्छौँ।

पृथ्वी जयन्ती तथा राष्ट्रिय एकता दिवसका अवसर पारेर विवेकशील साझा पार्टीले पौष २७ गतेदेखि ‘मेची-महाकाली राष्ट्रिय एकता यात्रा’ सुरु गर्दैछ। उक्त यात्रा माघ १६ गते शहीद दिवसका दिन अन्त्य हुनेछ। उक्त यात्रामा जहाँ, जसरी सम्भव हुन्छ, सहयोग र सहभागिताका लागि सम्पूर्ण नेपालीहरूमा विवेकशील साझा पार्टी हार्दिक अपिल गर्दछ।

शरदराज पाठक
प्रवक्ता
विवेकशील साझा पार्टी
मिति: २० पुष २०७८