किसान आन्दोलनमा राजेन्द्र महतोको समर्थन, माग पूरा गर्न सरकारसँग अनुराेध

जनकपुरधाम । लोकतान्त्रिक समाजवादी पार्टी (लोसपा) का वरिष्ट नेता राजेन्द्र महतोले किसान आन्दोलनको माग सम्बोधन गर्न सरकारसँग अनुरोध गरेका छन् ।

धनुषा क्षेत्र नम्बर ३ बाट निर्वाचित संघीय सांसद समेत रहेका उनले विज्ञप्ती जारी गरेर आन्दोलनलाई समर्थन जनाउँदै माग पूरा गर्न आग्रह गरेका हुन् ।

विगत दुई सातादेखि मलखाद, बीउवीजन, सिचाई, उखु किसानको भुक्तानीलगायतको माग राख्दै जारी आन्दोलनका माग सम्बोधन गर्नुको सट्टा सरकारले गरिरहेको दमनको घोर भत्र्सना समेत गरेका छन् ।

किसानहरु सडकमा उत्रिएपनि सरकारले उचित व्यवस्थापनसहितको संवाद नगरी दमनमा उत्रिएको देख्दा सरकारको किसान विरोधी मानसिकता उजागर भएको उनले विज्ञप्तीमा उल्लेख गरेका छन् ।

उनले किसान आन्दोलनका क्रममा पक्राउ परेका किसान नेताहरुलाई तत्काल रिहा गर्न र वार्ता संवादमार्फत किसानहरुको माग पुरा गर्न सरकारसँग अनुरोध गरेका छन् ।

साथै आन्दोलनका क्रममा घाईते भएकाहरुको शीघ्र स्वास्थ्य लाभको कामना गर्दै उपचारको व्यवस्था मिलाउन पनि सरकारसँग अनुरोध गरेका छन् ।