केन्द्रीय सदस्य पोखरेलले बाँडे विपन्न परिवारलाई सोलार सेट

प्यूठान । नेपाली कांग्रेसका नवनिर्वाचित केन्द्रीय सदस्य डा. गोविन्दराज पोखरेलले गृहजिल्लामा विद्युतीकरणको पहुँचमा नरहेका नागरिकलाई सोलार सेट उपलब्ध गराएका छन् ।

प्यूठानको स्वर्गद्वारी नगरपालिकाको वडा नम्बर ७ मा विद्युतको पहुँचमा नरहेका ३ घरपरिवारलाई पोखरेलले निशुल्क सोलार सेट हस्तान्तरण गरेका हुन् ।

सोलार सेट हस्तान्तरण गर्दै केन्द्रीय सदस्य पोखरेलले विद्युतीकरण नपुगेका स्थानमा यथाशीघ्र विद्युतका लागि पहल समेत गर्ने बताए ।

‘अहिलेको जामानामा पनि विद्युतको उपयोगबाट बञ्चित हुनपर्नु दुः खद विषय हो । तत्कालका लागि सोलार सेट उपलब्ध गराएका छौं । दीर्घकालीन रुपमा विद्युतीकरणका लागि कांग्रेसले पहल गर्छ’, पोखरेलले भने ।

पोखरेल प्यूठानबाट कांग्रेस केन्द्रीय समितिमा प्रतिनिधित्व गर्ने पहिलो नेता हुन् । उनको सम्मानमा नेपाली कांग्रेस स्वर्गद्वारी नगर समितिले आयोजना गरेको कार्यक्रममा नै विपन्न परिवारलाई सोलार सेट वितरण गरिएको हो ।

पोखरेल केन्द्रीय सदस्य निर्वाचित भएर जिल्ला पुगेसँगै सम्मान तथा पार्टी प्रवेश कार्यक्रममा व्यस्त रहँदै आएका छन् ।

विभिन्न पालिका र क्षेत्रमा आयोजित कार्यक्रममा हालै २ सय ३४ जना अन्य पार्टीबाट कांग्रेसमा प्रवेश गरिसकेको जिल्ला सभापति विष्णकुमार गिरीले जानकारी दिए ।