चिनियाँ राष्ट्रपतिको नयाँवर्ष सम्बोधन : हङकङ र ताइवानलाई फकाउनेदेखि आधुनिक समाजवादी चीन बनाउने सम्मका उद्घोष

बेइजिङ । चिनियाँ राष्ट्रपति सी चिनपिङले बेइजिङमा आयोजित स्वागत समारोहमा चिनियाँ कम्युनिष्ट पार्टी केन्द्रीय समिति (सीपसी) र राज्य परिषद्को तर्फबाट नागरिकलाई वसन्त पर्वको शुभकामना दिएका छन् ।

सीपीसी महासचिव तथा केन्द्रीय सैन्य आयोगका अध्यक्ष सीले ग्रेट हल अफ द पिपुलमा भएको भेलालाई सम्बोधन गर्दै सबै जातीय समूहका चिनियाँ जनतासहित हङकङ, मकाउ र ताइवानबासीलाई समेत शुभकामना दिए ।

विश्लेषकहरूले राष्ट्रपति सीको उक्त सम्बोधनले गतवर्ष चीनले हासिल गरेका उपलब्धि र तिनको ऐतिहासिक महत्त्वलाई संक्षेपमा प्रस्तुत गरेको छ र भविष्यका लागि आत्मविश्वास, साहस र दृढ संकल्पको स्पष्ट सन्देश पनि दिएको छ। चीनको नयाँवर्ष समेत भनिने वसन्त उत्सव फेब्रुअरी १ मा मनाइन्छ ।

२०२१ मा सीपीसी र मुलुकले उल्लेखनीय प्रगति हासिल गरेको बताउँदै पार्टीको १०० वर्षको इतिहासमा तेस्रो ऐतिहासिक संकल्प पारित गर्ने काम महत्वपूर्ण उपलब्धी भएको बताए । निरपेक्ष गरिबीविरुद्धको लडाइँ, सबै हिसाबले मध्यम समृद्ध समाज निर्माण गर्ने पहिलो शताब्दीको लक्ष्यको प्राप्ति र पूर्णरूपमा आधुनिक समाजवादी चीनको निर्माणको नयाँ यात्राको सुरुवात भएको राष्ट्रपति सीको भनाई छ ।

गतवर्ष, चीनले आर्थिक विकास र कोभिड-१९ महामारी नियन्त्रणको सन्दर्भमा विश्वमा आफ्नो अग्रणी स्थान कायम राखेको सीले बताए । चीनको उच्च गुणस्तरीय विकास, रणनीतिक विज्ञान तथा प्रविधिको क्षमता, सुधार र खुलापन र जनताको हितमा चीनले प्रगति हासिल गरेको उनको भनाई थियो ।

हङकङमा व्यवस्था पुनर्स्थापित भएको र पृथकतावादी शक्तिहरूसँग लड्न र राष्ट्रिय पुनर्मिलनलाई सहज बनाउन थप प्रयासहरू गरिएको पनि सीले उल्लेख गरे। ‘हामीले जस्तोसुकै मोड वा चुनौतिहरूको सामना किन गर्नु नपरोस, हामीले सीपीसीको महान भावनालाई अघि बढाउनेछौं र सिथिलता तथा प्रतिकूलताको अन्त्य गर्छौ ।’

विज्ञहरूले सन् २०२१ चीनको लागि गौरवको वर्ष भए पनि धेरै चुनौतिसहित मिसिएको बताए । अमेरिकाले रणनीतिक दबाबहरु कायमै राखेको बेला उक्त वर्ष महामारीको प्रभावमा चिनियाँ अर्थतन्त्रले पनि कठिनाइहरूको सामना गर्नुपरेको थियो।

सीपीसीले विगत पाँच वर्षमा गरेका कामको समीक्षा गर्न र आगामी अवधिको विकासको खाका तयार गर्न सन् २०२२ को दोस्रो भागमा २० औं राष्ट्रिय महाधिवेशन गर्ने सीले बताए। महाधिवेशनको लागि ठोस कार्यहरूमा जोड दिँदै सीले बोर्डमा सुधार र खुलापनलाई अगाडि बढाउन, उच्च गुणस्तरीय विकास प्रवर्द्धन गर्न र जनताको हित सुनिश्चित र सुधार गर्न प्रयास गर्न आग्रह गरे ।

स्थिर र स्वस्थ अर्थतन्त्र, सुरक्षित र शान्त समाज र इमान्दारिता र अखण्डतासहितको राजनीतिक इकोसिस्टम कायम राख्नमा ध्यान केन्द्रित हुनुपर्छ, सीले भने।

बेइजिङ २०२२ शीतकालीन ओलम्पिक र पाराओलम्पिक छेकोमा, चिनियाँ जनता विश्वका लागि एक सुव्यवस्थित, सुरक्षित र भव्य भेला प्रस्तुत गर्न पूर्णरूपमा तयार छन्, सीले भने। उनले स्वदेश तथा विदेशका खेलाडीहरुलाई शुभकामना दिएका छन् ।