कर्णालीमा कांग्रेसबाट मन्त्री छान्न मुख्यमन्त्रीलाई सकस, शाही र बुढाको दाबी

सुर्खेत । जीवनबहादुर शाही कर्णालीका मुख्यमन्त्री भएको तीन महिना पूरा भयो । तर उनले अझै आफ्नै दलभित्रको किचलोका कारण मन्त्रिमण्डललाई पूर्णता दिन सकेका छैनन् । उनले नेकपा माओवादी केन्द्रबाट बिन्दमान विष्ट र नेकपा एकीकृत समाजवादीबाट चन्द्रबहादुर शाहीलाई मन्त्री बनाए पनि आफ्नै दल नेपाली कांग्रेसबाट मन्त्री बनाउन सकेका छैनन् ।

कांग्रेसको भागमा परेको एक मन्त्रालयका लागि दुईजनाको दाबी भएपछि उनले मन्त्री बनाउन नसकेका हुन् । मन्त्री बन्नका लागि दैलेखका हिमबहादुर शाही र सुर्खेतका यज्ञबहादुर बुढाले लबिङ गरिरहेका छन् । बुढा यसअघि प्रदेशका सामाजिक विकासमन्त्री थिए ।

शाही र बुढा दुवैलाई कांग्रेस उपसभापति पूर्णबहादुर खड्काले मन्त्री बनाउने आश्वासन दिएका थिए ।

शाही नेपाली कांग्रेस कर्णाली प्रदेशको महामन्त्रीका दाबेदार थिए । उनलाई खड्काले मन्त्री बनाउने आश्वास दिएर महामन्त्रीबाट ‘ब्याक’ गराएको बुझिएको छ । त्यस्तै कांग्रेस जिल्ला सभापतिका दाबेदार बुढालाई पनि खड्काले मन्त्री बनाउने आश्वासन दिएर ‘ब्याक’ गराएका थिए । अहिले पनि दुवैले मन्त्रीका लागि एकोहोरो दाबी गरेपछि मुख्यमन्त्रीलाई मन्त्री छान्न सकस भएको हो ।

कांग्रेसले दुई मन्त्रालय पाउने सम्भावना छैन ।