नयाँ पार्टी बनाएर चुनाव लड्ने कमल थापाको सन्देश, बहिर्गमनको यस्तो छ तयारी

काठमाडौं । राप्रपाका पूर्वअध्यक्ष कमल थापाले पार्टीबाट बहिर्गमनको अन्तिम तयारी गरेका छन् । आज एक पार्टी प्यालेसमा आफू पक्षधरको भेला आयोजना गर्दै उनले स्थानीय चुनावको घोषणासम्म माग सम्बोधन नभए नयाँ पार्टी गठन गर्ने स्पष्ट सन्देश दिए ।

भेलामा राप्रपाका थापा पक्षधर पदाधिकारी तथा केन्द्रीय सदस्यहरुको सहभागिता थियो । उपाध्यक्षहरू ध्रुवबहादुर प्रधान, बुद्धिमान तामाङ, रोशन कार्की तथा महामन्त्री कुन्ती शाही भेलामा उपस्थित भएका थिए । थापाले एकतर्फीरुपमा आफ्ना कुरा राखेर भेला टुंग्याएका थिए । उनले अरुलाई बोल्ने मौका दिएनन् ।

थापाले आफ्नो तयारीबारे अन्तिमपटक जानकारी गराउन भेला आयोजना गरेको बताएका थिए ।

उनले भने, ‘यदि मैले उठाउँदै आएका विषयवस्तुहरु सम्बोधन भएनन् भने म यत्तिकै निरीह भएर बसिरहन सक्दिनँ, अर्को विकल्पमा जानैपर्छ । त्यो भनेको नयाँ पार्टी बनाएर जाने नै हो । मलाई साथ दिने वा नदिने विषयमा तपाईंहरु आफ्नो निर्णय लिन स्वतन्त्र हुनुहुन्छ । म कसैलाई पनि करकाप गर्दिनँ ।’

स्रोतका अनुसार नयाँ पार्टी गठन गर्दा थापाले दुई विकल्प सोचेका छन् । पहिलो विकल्प भनेको राप्रपाबाट अलग भएर आफ्नै नेतृत्वमा नयाँ पार्टी दर्ता गर्ने । यो तरिका अपनाउँदा विगतमा आफूले राप्रपा नफुटाउने भनेर खाएको कसम नतोडिने उनको तर्क छ ।

आफू अझै पनि राप्रपा फुटाउने पक्षमा नभएको थापाले बताए । ‘मेरो ९९ प्रतिशत चाहना राप्रपामै रहेर काम गरौं भन्ने नै हो । तर, अब सबै अध्यक्ष र केन्द्रीय समितिको हातमा छ । म अध्यक्षको निर्णयको प्रतीक्षामा छु ।’

आफू नयाँ पार्टीको गृहकार्यमा रहेको थापाले जानकारी गराए । तर, आफ्नो माग सुनवाइ भयो भने सबै तयारी स्थगित गर्ने उनको भनाइ थियो । ‘तपाईंहरु राजेन्द्र लिङदेनलाई भन्नुस्, यदि मेरो सक्रियता राप्रपामा नै रहोस् भन्ने उहाँ चाहनुहुन्छ भने माग सम्बोधन हुनुपर्छ,’ थापाले भने ।

उनले राप्रपा अध्यक्ष लिङ्देन अस्ति आफूलाई भेट्न आएको र भावुक कुराकानी गरेको जानकारी दिए । ‘उहाँलाई मैले पार्टी आजै फुटाइहाल्छ कि भन्ने लागेको रहेछ । तर, मैले चुनाव घोषणासम्म पर्खिन्छु भनेको छु,’ थापाले भने ।

थापाका दुई विकल्प

थापाले पार्टीको महाधिवेशनमा निर्मल निवासले हस्तक्षेप गरेको दाबी गर्दै त्यसको छानबिन हुनुपर्ने माग पार्टीका राखेका छन् । तर, उनको माग राप्रपाले सुनवाइ गर्ने सम्भावना न्यून देखिएका छ । त्यो बुझेका थापाले नयाँ पार्टी गठनको आन्तरिक गृहकार्य गरिरहेका छन् ।

थापाले गठन गर्ने नयाँ पार्टी सैद्धान्तिकरुपमा राजसंस्था पक्षधर नै रहे पनि कार्यनीतिक रुपमा राजसंस्थाबारे ‘साइलेन्ट’ रहने छ । हिन्दूराष्ट्रको पुनःस्थापनालाई प्रमुख एजेन्डा बनाएर चुनाव लड्ने तयारी थापाले गरेका छन् । पार्टीको नाम, चुनाव चिह्नलगायतका विषयमा भने टुंगो लागेको छैन ।

स्रोतका अनुसार नयाँ पार्टी गठन गर्दा थापाले दुई विकल्प सोचेका छन् । पहिलो विकल्प भनेको राप्रपाबाट अलग भएर आफ्नै नेतृत्वमा नयाँ पार्टी दर्ता गर्ने । यो तरिका अपनाउँदा विगतमा आफूले राप्रपा नफुटाउने भनेर खाएको कसम नतोडिने उनको तर्क छ ।

‘अहिलेको अवस्थामा हेर्दा ४० प्रतिशत पुर्याउन सक्ने देखिन्छ । तर, विगतमा कसम खाएकाले आफ्नै नेतृत्वमा उहाँले पार्टी फुटाउनुहुन्न । आफ्नो पक्षका पदाधिकारीमध्येबाट वा अर्को कोही पुरानो नेतालाई अध्यक्ष दिएर पार्टी दर्ता गर्ने सोच छ,’ स्रोतले भन्यो ।

यद्यपि, आफूलाई ४० प्रतिशतले साथ दिने अवस्था भयो भने पार्टीलाई औपचारिक विभाजन गर्न पनि थापा पछि पर्ने छैनन् । तर, त्यो अवस्थामा अर्को कुनै नेतालाई अघि सारेर अध्यक्ष बनाउने उनको योजना रहेको स्रोतले बतायो ।

‘अहिलेको अवस्थामा हेर्दा ४० प्रतिशत पुर्याउन सक्ने देखिन्छ । तर, विगतमा कसम खाएकाले आफ्नै नेतृत्वमा उहाँले पार्टी फुटाउनुहुन्न । आफ्नो पक्षका पदाधिकारीमध्येबाट वा अर्को कोही पुरानो नेतालाई अध्यक्ष दिएर पार्टी दर्ता गर्ने सोच छ,’ स्रोतले भन्यो ।

तर, थापाले अहिलेसम्म अध्यक्षमा अघि सार्ने उपयुक्त पात्र भेटिसकेका छैनन् । राप्रपाका अर्का पूर्वअध्यक्ष पशुपतिशम्शेर राणासँग उनलाई केही आशा छ । राप्रपाको चुनावमा राणाले थापाको पक्षमा सदासयता देखाएका थिए । त्यसैले पार्टी विभाजन गर्न तयार भए थापाले राणालाई नै अध्यक्ष मान्नसक्ने स्रोतले बतायो ।

हाल राप्रपाको नेतृत्वमा थापा पक्षधरहरु उल्लेख्य संख्यामा छन् । तर पार्टी फुटाउने सवालमा भने उनलाई कमैको साथ मिल्ने देखिएको छ । अहिलेसम्म कोही पनि पदाधिकारी थापाको पक्षमा खुलेर आएका छैनन् । आजको भेलामा सहभागी भएका पदाधिकारी र केन्द्रीय सदस्यहरु पनि अधिकांश नयाँ पार्टी गठनको सवालमा थापासँग असहमत छन् ।

थापानिकट स्रोतले भने हालको केन्द्रीय समितिमा आफ्नो पक्षबाट निर्वाचित भएकामध्ये आधाउधिले साथ दिनसक्ने आशा व्यक्त गर्यो ।