‘नेपहपको श्रीपेच’ फागुन १६ देखि प्रसारण हुने : ट्रेलरमा भाइरल ‘माइला’को प्रस्तुति

काठमाडौं । प्रतीक्षित र्‍याप गायन रियालिटी सो ‘नेपहपको श्रीपेच’को ट्रेलर लन्च भएको छ जहाँ पछिल्लो समय सामाजिक संजालमा चर्चित र्‍यापर माइलालाई चित्रण गरिएको छ ।

ट्रेलरमा मिस्टर डी, डेजेन र कवि-जीलाई प्रि-जजको रुपमा देखाइएको छ । तर, सोका निर्णायकमा चाहिँ र्‍यापर बालेन शाह, गिरिश खतिवडा र मानस घले रहनेछन् । यसअघि निर्माण टिमले पहिलो ट्रेलरमा फिमेल र्‍यापर फुर्दुकीलाई देखाएको थियो जसले अहिलेसम्म युट्युबमा २ लाख तीस हजार भ्युज र विभिन्न सामाजिक सञ्जालमा २० लाख भ्युज प्राप्त गरेको थियो ।

यो रियालिटी सो फागुन १६ गतेदेखि इमेज टेलिभिजन र डी म्युजिक टिभी मार्फत प्रसारणमा आउने भएको छ । नेपालमा पहिलो पटक हुन लागेको ‘नेपहपको श्रीपेच’ र्‍याप म्युजिक रियालिटी शो हो । डी म्युजिक टिभीको प्रस्तुती रहेको उक्त शोलाई सुदिप पोख्रेल र रोशन श्रेष्ठले निर्माण गरेका हुन् ।

कार्यक्रमका लागी ८००० भन्दा बढीले डिजिटल अडिसनमार्फत भाग लिएका थिए भने जसमध्ये ६०० जनाको बिभिन्न शहरमा फिजिकल अडिसन लिइएको थियो । अब फिजिकल अडिसनबाट छानिएका १२३ जना ले श्रीपेचको लागी प्रतिस्पर्धा गर्नेछन् । सोका विजेताले १० लाख र उपविजेता ले ५ लाख प्राप्त गर्नेछन् ।