माओवादीले भन्यो- द्वन्द्वकालीन मुद्दा उछालेर सभामुखमाथि आक्रमण गर्नु क्षेत्राधिकारको उल्लंघन

काठमाडौं । नेकपा (माओवादी केन्द्र) ले सत्य निरुपण तथा मेलमिलाप आयोगको क्षेत्राधिकार भित्रका द्वन्द्वकालीन मुद्दालाई उछालेर सभामुखमाथि आक्रमण गरेको भन्दै यसका पछाडि गम्भीर षडयन्त्र रहेको बताएको छ ।

कणकमणि दिक्षित लगायतका केही अभियान्ताले हिजो द्वन्द्वकालीन मुद्दाका प्रशंग उठाउँदै सभामुख अग्नि सापकोटालाई कारबाही गर्नुपर्ने माग गरेको भोलिपल्ट माओवादीले यस्तो बताएको हो ।

माओवादी केन्द्रका अध्यक्ष पुष्पकमल दाहाल प्रचण्डका स्वकीय सचिव रमेश मल्लले समाजिक सञ्जालमा धारणा व्यक्त गर्दै यसभित्र गम्भीर षडयन्त्र भएको बताएका हुन् । ‘जनप्रतिनिधिमुलक संस्थामाथी प्रहार गरेर जन्मिएको प्रतिगमनलाई परास्त गरी आज मुलुक पुनः निर्वाचनको प्रक्रिया हुँदै शान्ति र संविधानलाई नयाँ उचाईमा कृयाशिल गर्न सक्रिय रहेको बेला सत्य निरुपण तथा मेलमिलाप आयोगको क्षेत्राधिकार भित्रका द्वन्द्वकालिन मुद्दालाई उछालेर सम्माननीय सभामुखमाथि आक्रमण गर्नु प्रतिक्रियावादी षडयन्त्रको गम्भीर अभिव्यक्ति हो,’ मल्लले भनेका छन् ।

‘मुलुकलाई बहुआयामिक द्वन्द्वतिर धकेल्न’ यस्तो मुद्दा उछालिएको मल्लको टिप्णी छ । ‘यो कार्य शान्ति, संविधान र समृद्धिको नेपाली मौलिक बाटोलाई ध्वस्त गर्ने, परिवर्तनको मार्गबाट देशलाई विचलित गराउने र मुलुकलाई बहुआयामिक द्वन्द्वतिर धकेल्ने उद्देश्यद्वारा प्रेरित छ,’ उनले भनेका छन्।