पूर्वपति छविले दिए रेखालाई बिहेको बधाई, शिल्पासँगको डिभोर्स अझै अदालतमा

काठमाडौं । फिल्म निर्माता छविराज ओझासँगको वैवाहिक सम्बन्ध टुंगिएको ९ वर्षपछि रेखा थापाले दोस्रो बिहे गरिन् । पर्यटन व्यवसायी बलराम शाहीसँग गत माघ ११ गते रेखाले कानूनी बिहे गरेकी थिइन् ।

तर, पूर्वपत्नीप्रतिको छविको प्रेम भने अहिले पनि निरन्तर रहेको बुझ्न सकिन्छ । रेखाको बिहेको खबर सार्वजनिक भएपछि छविले बधाई दिँदै उनको वैवाहिक जीवनको कामना गरेका छन् ।

नेपाल प्रेससँग उनले भने, ‘रेखाजीको बिहे भएको खबर सुनेँ । यसप्रति म खुशि छु र उहाँलाई वैवाहिक जीवनको बधाई र शुभकामना दिन चाहन्छु ।’ छविले निर्माण गरेको फिल्म ‘हिरो’बाटै रेखाले अभिनय करिअर थालेकी थिइन् ।

बाघ निर्माताको रुपमा चिनिएका छवि र रेखाबीच सोही फिल्मको छायांकनदेखि नै अफेयर भएको बताइन्छ । तर, बिहे भएको एक दशकपनि यी दुईजनाको सम्बन्ध टिकेन ।

शिल्पासँग अझै हुन सकेन डिभोर्स

छवि र अभिनेत्री शिल्पा पोखरेलबीच अझै पनि कानूनीरुपमा सम्बन्ध विच्छेद हुन सकेको छैन । सम्पत्ति भागबण्डामा कुरा नमिलेपछि यी दुईजनाको मुद्दा अहिले पनि जिल्ला अदालत काठमाडौंमै चलिरहेको छ ।

कोरोनाको लकडाउन सुरु हुनुअघि शिल्पाले छविविरुद्ध सम्बन्ध विच्छेदको मुद्दा दायर गरेकी थिइन् । तर, अहिले पनि कानूनी प्रक्रिया अघि बढिरहेकाले डिभोर्स कहिले हुने हो कुनै टुंगो छैन ।