नेकपा एसका प्रवक्ता भन्छन्- सहमतिबिना एमसीसी अघि बढाए देउवाले प्रधानमन्त्री पद त्याग्नुपर्ने हुनसक्छ (भिडिओ)

काठमाडौं । नेकपा एकीकृत समाजवादीका उपमहासचिव तथा प्रचार विभाग प्रमुख जगन्नाथ खतिवडाले गठबन्धनको सहमतिबिना एमसीसी अनुमोदन गर्न खोजिए प्रधानमन्त्री शेरबहादुर देउवाले पद त्याग्नुपर्ने अवस्था आउने चेतावनी दिएका छन् ।

नेकपा एसको स्थायी कमिटी बैठकपछि नेपाल प्रेससँग कुरा गर्दै प्रवक्ता खतिवडाले एमसीसी टेबल हुनु र सांसदहरुले छलफलमा भाग लिन पाउनु स्वभाविक भए पनि अहिले संसद अवरोध भएकाले त्यो अघि बढ्न नसक्ने बताए ।

खतिवडाले भने– संसदको अवरोध हटेपछिमात्र सोच्न सकिन्छ । टेबल गर्नु कुनै अनौठो होइन । सांसदहरुले विचार विमर्श गर्न पाउनुपर्छ । तर कानूनका समस्या र संसद अवरोधका कारण त्यो सम्भव छैन । गठबन्धनले नचाहेसम्म उहाँल अघि बढाउन सक्नुहुन्न । गठबन्धनले नचाहेको र संसदको अवरोध कायम भएको बेला उहाँले अघि बढाएमा उहाँ अल्पमतमा पर्नुहुन्छ र प्रधानमन्त्री पद पनि त्याग्नुपर्ने अवस्था आउनसक्छ ।

नेकपा एसको बैठकमा सम्मानित नेता झलनाथ खनालको संयोजकत्वमा गठित कार्यदलले एमसीसीबारेको प्रतिवेदन पेश गरेको थियो । कार्यदलमा प्रमेश हमाल, डा.विजय पौडेल र जगन्नाथ खतिवडा छन् ।