एमसीसीतर्फ संकेत गर्दै उपराष्ट्रपतिले भने- दूरगामी महत्वका विषयमा राष्ट्रिय सहमति नहुँदा देशलाई राम्रो गर्दैन (भिडिओ)

काठमाडौं । उपराष्ट्रपति नन्दबहादुर पुनले दूरगामी महत्वका विषय राष्ट्रिय सहमतिमा मात्र अघि बढाउनुपर्ने बताएका छन् ।

सोमवार अन्तर्राष्ट्रिय मातृभाषा- २०२२ का उपलक्ष्यमा नेपाल प्रज्ञा प्रतिष्ठानले आयोजना गरेको मातृभाषा राष्ट्रिय कविता महोत्सव- २०७८ मा उपराष्ट्रपति पुनले ‘एमसीसी’ शब्द भने उच्चारण गरेनन् । तर, उनको सम्बोधन त्यसतर्फ ईंगित थियो ।

देशमा राष्ट्रिय, अन्तर्राष्ट्रिय विषयहरूमा मतभिन्नता प्रकट भइरहेको भन्दै उपराष्ट्रपति पुनले दूरगामी महत्वको विषयमा राष्ट्रिय सहमति हुँदा राम्रो हुनेमा जोड दिए ।

उपराष्ट्रपतिले भने, ‘अहिले देशभित्र विभिन्न राष्ट्रिय, अन्तर्राष्ट्रिय महत्वका विषयहरूमा छलफल र मतभिन्नताहरु प्रकट भइरहेका छन् । दूरगामी महत्व राख्ने राष्ट्रिय, अन्तर्राष्ट्रिय महत्वका विषयमा राष्ट्रिय सहमति हुँदा राम्रो हुन्छ । राष्ट्रिय सहमति नहुँदा यसले राजनीतिक द्वन्द्व पैदा हुनसक्ने खतरा हुन्छ । र, यसले देशलाई राम्रो गर्दैन । यसमा हामीले विगतबाट पाठहरू पनि सिक्न सक्नुपर्दछ । म यसतर्फ सबै पक्षको गम्भीर ध्यानाकर्षण गराउन चाहान्छु ।’

उपराष्ट्रपति पुनले मातृभाषालाई सरकारी कामकाजको भाषा बनाउनुपर्नेमा जोड दिएका छन् । भाषा आयोगले सिफारिस गरेअनुसार सम्बन्धित प्रदेशहरूमा मातृभाषामा सेवा दिन ढिलाइ गर्न नहुनेतर्फ उनले ध्यानाकर्षण गराए ।