‘म यस्तो गीत गाउँछु-२’ आजबाट हलमा, पलको स्क्यान्डलले फाइदा होला कि घाटा ?

काठमाडौं । पल शाह र पुजा शर्मा अभिनित चलचित्र ‘म यस्तो गीत गाउँछु-२’ आजबाट सिनेमा घरहरूमा रिलिज भएको छ । दुई दिनअघि आयोजना गरिएको प्रिमियरमा कलाकर्मीहरूले चलचित्रको खुलेर प्रशंसा गरेका थिए ।

विभिन्न कारणले ‘म यस्तो गीत गाउँछु’ को व्यापारलाई यतिबेला निकै चासोका साथ हेरिरहेको समग्र चलचित्र जगतले । सबैभन्दा ठूलो चासो त नायक पल शाहको काण्डले यो चलचित्रलाई कति असर पुर्‍याउँछ भन्ने हो । चलचित्रको नायक नै जबर्जस्ती करणीको गम्भीर अपराधमा मुछिन पुगेका छन् । पलविरुद्ध जाहेरी परेपछि प्रहरीले पक्राउ पूर्जी जारी गरेर उनको खोजी गरिरहेको छ । पल फरार छन् ।

फिल्मको व्यापारलाई सामान्यतया स्क्यान्डलहरूले प्रायः फाइदा पुर्याएको पाइन्छ । त्यसै भएर कतिपय निर्माता/निर्देशकले फिल्म रिलिजको छेकोमा विभिन्न बनावटी स्क्यान्डल पनि बनाउने कोसिस गर्छन् । तर, यसो गर्दा कहिलेकाहीँ बुमर्याङ पनि हुन सक्छ, जस्तो केही समयअघि ‘डाँडाको वर पिपल’ लाई भयो ।

उक्त चलचित्रका निर्देशक शोभित बस्नेतले फिल्मलाई चर्चामा ल्याउने हेतु रिलिजको बेलामा भुवन केसीलाई ‘महानायक’ को दर्जा दिन खोजे । तर, त्यो यति धेरै विवादित भयो कि पछि उनले बारम्बार माफी माग्दा पनि धर पाएनन् । चलचित्रले दर्शक पाएन ।

अहिले पल शाह जुन काण्डमा मुछिएका छन्, त्यसले उनको व्यक्तिगत छवि ध्वस्त भएको छ । नायक नै बलात्कार आरोपमा मुछिएका बेला उनको चलचित्र हेर्न दर्शक आउलान् त भन्ने प्रश्न उठ्छ । तर, अर्को पाटो के छ भने यो घटनामा पल शाहप्रति सहानुभूति दर्शाउने पनि उत्तिकै छन् । पलका वास्तविक फ्यानहरू यो चलचित्र हेर्न जसरी पनि हलसम्म पुग्न सक्छन् । त्यसैले यो पलको स्टारडमको परीक्षा पनि हो ।

अस्ति प्रिमियरमा धेरै कलाकारहरूले चलचित्रको कथावस्तु पल शाहकै जीवनसँग मिल्दोजुल्दो रहेको प्रतिक्रियासमेत दिएका थिए । यस चलचित्रको क्लाइमेक्समा पललाई प्रहरीले पक्राउ गरेको देखाइएको छ । चलचित्रमा उनले एउटा सुपरस्टार गायको भूमिका निर्वाह गरेका छन् ।

साढे २ करोडको लागतमा निर्मित यो चलचित्रको निर्देशन सुदर्शन थापाले गरेका हुन् । चलचित्रमा पलसँग पुजा शर्माको जोडी छ ।

कोरोनाका कारण यो चलचित्रको रिलिज दुई वर्षसम्म रोकिएको थियो । कोरोनाको तेस्रो लहर साम्य भएर हलहरू खुले पनि अहिलेसम्म नेपाली चलचित्रले दर्शक पाउन सकेको छैन । यस चलचित्रले हलमा दर्शक फर्काउने आशा राखिएको थियो ।