सहिदहरु परिवर्तनकारी आन्दोलनका इतिहास हुन् : शिक्षामन्त्री पौडेल

काठमाडौं । शिक्षा, विज्ञान तथा प्रविधिमन्त्री एवम् माओवादी नेता देवेन्द्र पौडेलले सहिदहरु परिवर्तनकारी आन्दोलनको ईतिहास भएको बताएका छन् ।

शनिबारबाट सुरु भएको नेकपा माओवादीको सहित सप्ताह कार्यक्रमलाई सम्बोधन गर्दै मन्त्री पौडेलले देशमा भएका विभिन्न आन्दोलनमा सहिदहरुले जीवन समर्पण नगरेको भए गणतन्त्र सम्भव नभएको बताए ।

उनले जनयुद्धले स्थापित गरेका मुद्धाहरु कार्यान्वयनका लागि निरन्तर लडिरहने समेत बताए । अल्पसंख्यक, उत्पीडित र जातिय विभेद अन्त्यका लागि माओवादीले जनयुद्ध गर्नुपरेको भन्दै उनले राज्यले विभेदकारी व्यवहार गर्न नहुने धारणा व्यक्त गरे ।

‘सहिदहरु आस्थाका धरोहर हुन्’, उनले भने ‘राजनैतिक पार्टी, विचार वा सिद्धान्तले सहिदहरुलाई विभक्त गर्न मिल्दैन । जुनसुकै आन्दोलमा सहिद भएपनि सहिदहरुले देशकै लागि जीवन समर्पित गरेका हुन् ।’

नेता पौडेलले जनयुद्धमा सहिद भएकाहरुलाई आतकंकारी आन्दोलनको रुपमा परिभाषित गरेर अपमानित गर्न खोजिएको आरोप लगाए । सहिद र सहिद परिवारले गरेको त्याग उत्सर्गकै कारण राजतन्त्रको अन्त्य गरी मुलुक सघींय लोकतान्त्रिक गणतन्त्रमा प्रवेश गरेको उनको भनाई थियो ।

फरक प्रसंगमा उनले देशको सार्वभौम अधिकार देशले नै निणर्य गर्नुपर्ने भन्दै यथास्थितिमा कुनै पनि हालतमा एमसीसी पास गर्न नहुने धारणा व्यक्त गरे ।