कैलाली कांग्रेसको नेतृत्वका लागि मतदान हुँदै, कसले मार्ला बाजी ?

कैलाली । नेपाली कांग्रेस कैलालीको जिल्ला अधिवेशन आज हुँदैछ । अहिलेका जिल्ला उपसभापति प्रकाशबहादुर बम ,पूर्वउपसभापति नारायणदत्त भट्ट र रामबहादुर कलेल प्यानलसहित चुनावी मैदानमा उत्रिएका छन् । बम र भट्ट संस्थापन पक्ष र कलेल संस्थापनइतर शेखर कोइराला पक्षका मानिन्छन् ।

बमको प्यानलबाट उपसभापतिमा खेमराज चौधरी र तेजशंकर भट्ट, सचिवमा नृप सुनार र थर्क शाह, सहसचिवमा कृष्ण पाण्डेय र राजेन्द्र खड्काले उम्मेदवारी दिएका छन् ।

भट्टको प्यानलबाट उपसभापतिमा भीम बडुवाल, रामप्रसाद चौधरी, सचिवमा केशव मिश्र र अमृत बीसी, सहसचिवमा रामसमझ राना र कलेसु चौधरीले उम्मेदवारी दर्ता गराएका छन् । यसअघि जिल्ला सभापतिमा उम्मेदवारी दिने बताउँदै आएका नेता बडुवालले भट्टको प्यानलबाट उपसभापतिमा उम्मेदवारी दिएका हुन् । अर्का सभापतिका आकांक्षी चौधरी भने बमको प्यानलको उपसभापतिमा समेटिएका छन् ।

शेखर कोइराला पक्षका कलेलको प्यानलबाट उपसभापतिमा यज्ञनिधि कोइराला र लोकराज पाण्डेय, सचिवमा देवानन्द जैशी र नवराज जोशी, सहसचिवमा रविन्द्रप्रताप सिंह र तीर्थराज जोशीले उम्मेदवारी दिएका छन् ।

निर्वाचन समितिकाअनुसार आइतबार बिहान नयाँ नेतृत्व चयनका लागि मतदान हुनेछ ।

नेपाली कांग्रेसको विधानअनुसार सभापतिमा विजयी हुने उम्मेदवारले ५१ प्रतिशत मत ल्याउनुपर्नेछ । तर कैलालीमा तीनजना चुनावी मैदानमा भएकाले पहिलो चरणमै सभापतिको छिनोफानो हुने सम्भावना कम रहेको नेताहरु बताउँछन् ।