संसदमा खनालले भने- यथास्थितिमा नो एमसीसी

काठमाडौं । नेकपा (एकीकृत समाजवादी) का सम्मानित नेता झलनाथ खनालले आफूहरू एमसीसीबारे व्याख्यात्मक घोषणाको पक्षमा नरहेको बताएका छन् । एमसीसीमाथि सदनमा सुरू भएको छलफलमाथि माग लिँदै खनालले व्याख्यात्मक घोषणाको कुनै कानूनी अर्थ नरहेको बताए ।

‘यथास्थितिमा नो एमसीसी,’ खनालले भने, ‘हामी यथास्थितिमा एमसीसी पास गर्ने पक्षमा छैनौं । यसमा व्यापक संशोधन र सुधार भएमा मात्रै सोच्न सकिन्छ ।’

उनले थपे, ‘व्याख्यात्मक घोषणा गरेर पास गर्ने कुरा आइरहको छ । यस कुराको ग्यारेन्टी के छ ? यो लिखतको कुनै कानूनी आधार छैन । त्यस कारण हामीले त्यसलाई स्वीकार गरेका छैनौं ।’

व्याख्यात्मक घोषणा अमेरिकाले स्वीकार गर्ने कुराको समेत कुनै ग्यारेन्टी नरहेको खनालको भनाइ छ । ‘त्यो सभाको एकतर्फी घोषणाबाहेक केही हुँदैन,’ खनालले भने, ‘अमेरिका यो सम्झौता सुधार गर्न तयार छ कि छैन् ? यसमा अमेरिका तयार छ कि छैन भन्ने कुराको ग्यारेन्टी हुनुपर्छ ।’

संसदमा एमसीसीमाथि छलफल हुन सदनको अवरोध हटाउनुपर्ने समेत खनालको माग छ ।