एमसीसी परिमार्जन गरेर मात्रै पास गर्नुपर्छ : माओवादी नेता पोखरेल (भिडिओ)

काठमाडौं । नेकपा माओवादी केन्द्रका नेता गिरिराजमणि पोखरेलले एमसीसी सम्झौता परिमार्जन गरेर मात्रै पारित गर्नुपर्ने बताएका छन् ।

प्रतिनिधिसभामा एमसीसी सम्झौतामाथिको छलफलमा भाग लिँदै पोखरेलले एमसीसी आर्थिक सहायताको दृष्टिले मात्रै नआएकोले यथास्थितिमा पारित गर्न नहुने बताएका हुन् ।

‘एमसीसी आर्थिक सहायकता हिसाबले मात्रै आएको भए हामीलाई आपत्ति हुने थिएन तर सम्झौतामा यस्ता शर्तहरू राखिएको छ जसले नेपालको सार्वभौमसत्ता लगायतका विषयमा गम्भीर प्रश्न उठाएको छ’ पोखरेलले भने ।

एमसीसीसँग भएका गोप्य र पूरक सम्झौता तथा पत्रहरूसमेत संसदमा पेस हुनुपर्ने भन्दै सांसद पोखरेलले नेपालको सार्वभौमिकतामाथि आँच आउनेगरी सम्झौता पारित हुन नदिन दलहरूले पहल गर्नुपर्ने बताए ।

देश सानो ठूलो भएपनि सार्वभौमिकता समान हुने भन्दै पोखरेलले एमसीसी सम्झौता संसदबाट पारित हुँदा ऐनस्तरको मान्यता पाउने तर संसदले सच्याउन नपाउने भन्ने कुरा गलत भएको पोखरेलको दाबी छ ।