नेकपा एसका नेताको टिप्पणी- सस्तो लोकप्रियतामा रमाउने कांग्रेस नेता मात्रै गठबन्धनको विरोधी (भिडिओ)

काठमाडौं । नेकपा (एकीकृत समाजवादी) का उपमहासचिव गंगालाल तुलाधरले कांग्रेसका सस्तो लोकप्रियताको पछि लाग्ने नेताहरूले मात्रै गठबन्धनको विरोध गरिरहेको टिप्पणी गरेका छन् । दुई दिनदेखि जारी केन्द्रीय कमिटी बैठकबीच विहीबार पत्रकारहरूसँग कुरा गर्दै तुलाधरले मुल नेतृत्व भने गठबन्धनकै पक्षमा रहेको दाबी गरे।

‘शीर्ष नेतृत्व पंक्तिले एउटा कुरा गर्ने र दोस्रो पंक्तिका नेताहरूले उत्ताउलो कुरा गर्नु सस्तो लोकप्रियताका लागि मात्रै हो भन्ने कुरा उहाँकै नेताहरूले भन्नुहुन्छ,’ उनले भने, ‘नेपाली कांग्रेसभित्र हिजो महाधिवेशनमा जित्नका लागि पनि चर्को नारा, अलि उत्ताउलो कुरा, अर्कालाई खसाल्ने कुरा गर्दा भोट आउँछ भन्ने कुराबाट ग्रसित हुनुहुन्थ्यो । त्यही मनोविज्ञानबाट ग्रसित केही नेताहरू भोलिको निर्वाचनमा आफ्ना पक्षहरूको पल्ला भारी गर्नका लागि यो कुरा उठाइरहेको जस्तो लाग्छ ।’

गठबन्धन आफूहरूलाई मात्रै नभइ कांग्रेसलाई समेत आवश्यक रहेको तुलाधरको भनाइ छ ।

‘गठबन्धनको आवश्यकता हामीलाई मात्रै होइन, गठबन्धनमा आबद्ध सबै दललाई आवश्यकता छ । अरु दलले त्यो चाहना गरेनन् भने त्यो नहुन पनि सक्छ । नेपाली कांग्रेसले चाहेन भने नेपाली कांग्रेस बाहेकको पनि गठबन्धन बन्न सक्छ । त्यो कुरा स्वयं नेपाली कांग्रेसलाई घाटा पनि हुनसक्छ ।’

यद्यपि नेपाली कांग्रेसको मुल नेतृत्व गठबन्धन कायमै गरेर जानुपर्छ भन्ने पक्षमा रहेको तुलाधरको भनाइ छ ।