‘फेक फेसबुक पोष्ट’को प्रतिवाद गर्दै प्रचण्डले भने- एमाले भन्ने गुटका मान्छेले कुप्रचार गरे (भिडिओ)

काठमाडौं । स्थानीय चुनाव केन्द्रित प्रशिक्षणका लागि सुर्खेत पुगेका माओवादी अध्यक्ष पुष्पकमल दाहाल ‘प्रचण्ड’लाई आफ्नै कार्यकर्ताले कुटपिट गरेको र चस्मा फुटाइदिएको भन्दै केहीले समाजिक संजालमा प्रचार गरे ।

हुँदै नभएका घटनाको प्रचार भएपछि सुर्खेत प्रहरीले नै त्यसको खण्डन गर्नुपर्‍यो । जिल्ला प्रहरी कार्यालय सुर्खेतले भ्रमपूर्ण र शान्तिसुरक्षाको दृष्टिकोणले गम्भीर प्रकृतिका सूचना सम्प्रेषण गरेको भन्दै कारवाहीको चेतावनी दियो ।

उक्त प्रचारबारे कार्यकर्ताले नै प्रचण्डलाई जानकारी गराए । त्यसबारे आफूलाई थाहा भएपछि आफूलाई हाँसो उठेको प्रचण्डले बताए । प्रचण्डले यसलाई ‘चुनावमा बढारिने भयले बिच्छिप्त भएकाहरुले गरेको प्रचार’ भनेका छन् ।

‘कर्णालीको भव्य र सभ्य कार्यक्रम काठमाडौंमा दुव्यर्वहार भयो भनेर कुप्रचार गरिएर भाइरल बनाइयो रे, मलाई हाँसो उठ्यो,’ प्रचण्डले भनेका छन्, ‘एमाले भन्ने गुटका मान्छेहरु विछिप्त भएका छन् । उनीहरुले यो प्रचार गरेको । झुटो प्रचार गरेर भएपछि बाहिर केही भ्रम दिन सकिन्छ की भनेर गरेको देखियो ।’