एमसीसीमा मैले गरेको निर्णय पार्टीमा फेल भयो भने राजीनामा दिन्छु- प्रचण्ड

काठमाडौं । नेकपा माओवादीका अध्यक्ष पुष्पकमल दाहाल प्रचण्डले एमसीसीको विवादलाई चुनावपछि फेरि छलफलमा ल्याउने गरी पार्टीमा टुंग्याइएको बताएका छन् । अध्यक्ष प्रचण्डले चुनावपछि हुने छलफलमा आफ्नो निर्णय र प्रस्ताव फेल भएमा आफूले राजीनामा दिने बताए । चुनावसम्म यो विषयलाई अपिलमार्फत साझा भाषा बनाएर जनतामाझ जाने सहमति पार्टीभित्र बनेको उनले दावी गरे ।

सञ्चारकर्मीसँग एक कार्यक्रममा कुरा गर्दै प्रचण्डले व्याख्यात्मक घोषणासहित एमसीसी पारित भएपछि तत्कालीन समाधान निस्केको बताए ।
उनले थपे, ‘यदि यो व्याख्यात्मक घोषणालाई कार्यान्वयनका क्रममा मिनिमाइज गरियो भने यो आन्दोलनको विषय हुन सक्छ ।’

यसले समस्याको मुलभूत समाधान भए पनि पार्टीमा एकमत भइनसकेको प्रचण्डले स्वीकार गरे । ‘चुनावसम्म यो विषयलाई अपिलमार्फत एउटै भाषा बनाउने र चुनावपछि फोरम चलाएर छलफल गर्ने सहमति भएको छ । माओवादी पार्टी फुट्छ कि भन्ने चितनलाई धैर्यतापूर्वक विवेकसम्मतरुपमा समाधान गरेका छौं ।’

अध्यक्ष प्रचण्डले चुनावपछि हुने छलफलमा आफ्नो निर्णय र प्रस्ताव फेल भएमा आफूले राजिनामा दिने बताए ।