स्थानीय निर्वाचनका लागि ललितपुरमा ३१ दल दर्ता

ललितपुर । जिल्ला निर्वाचन कार्यालय ललितपुरमा स्थानीय निर्वाचनमा भाग लिनका लागि ३१ वटा दल दर्ता भएका छन् ।  आइतबार ५ बजेसम्म जिल्ला निर्वाचन कार्यालयमा ३१ वटा दल दर्ता भएका  हुन् ।

जिल्लामा दर्ता भएका दलले पुरानै चिन्ह पाउने निर्वाचन कार्यालयकी सूचना अधिकारी सरस्वती शर्माले बताइन् । उनले भनिन्, ‘मतपत्र छाप्न र निर्वाचन प्रकृया सजिलो होस भनेर जिल्लामा पनि दल दर्ता गरिएको हो । आयोगमा पहिले नै दल दर्ता भइसकेको छ ।’

निर्वाचन आयोगले केही दिनअघि आचारसंहिता राजपत्रमा प्रकाशित गरिसकेको छ । यही चैत्र १३ गते आयोगले अन्तिम मतदाता नामावली प्रकाशन गर्दै छ ।  निर्वाचन आयोगले ललितपुरका हरेक पालिकामा केही दिनमा निर्वाचन अधिकृतको कार्यालय खोल्दै छ । मतदाता शिक्षाको कार्यक्रम पनि सुरु हुन बाँकी छ ।

सूचना अधिकारी शर्माका अनुसार ललितपुरमा नमुना मतदान कार्यक्रम पनि हुनेछ । सरकारले स्थानीय निर्वाचनका लागि म्यादी प्रहरी भर्ना सुरु भइसकेको छ र भने मतदाता शिक्षामा लागि सामाजिक परिचालक र स्वास्थ्य स्वयंसेवकहरु खटाउन पनि बाँकी नै छ ।