कांग्रेसको शेखर पक्षका नेताहरूको बैठक बस्दै

काठमाडौं । नेपाली कांग्रेसको संस्थापनइतर पक्षको बैठक आज बस्दैछ । डा. शेखर कोइराला नेतृत्वको समूहले चैत ११ गते बस्ने केन्द्रीय समितिका एजेण्डाबारे सामूहिक धारणा बनाउन छलफल गर्न लागेको हो ।

नक्सालस्थित एक होटलमा २ बजेपछि सुरु हुने बैठकमा कोइराला पक्षका पदाधिकारी र केन्द्रीय सदस्यहरु उपस्थित हुनेछन् । बैठकमा भ्रातृ संस्थाको तदर्थ समिति गठन, संसदीय समिति निर्माण, चुनावी तालमेल र अन्य विविध विषयमा छलफल हुने बताइएको छ ।

‘केन्द्रीय समितिको बैठकमा कसरी प्रस्तुत हुने भन्नेमा छलफल गर्न लागिएको हो । यो आन्तरिक र स्वभाविक बैठक हो’, शेखर समूहका एक केन्द्रीय सदस्यले भने । आजै कोइरालाले सभापति देउवासँग भ्रातृ संस्था र संसदीय समिति गठनबारे टेलिफोन संवाद गरेका थिए ।

कांग्रेसमा शेखर समूहका ४ जना पदाधिकारी र डेढ दर्जन बढी केन्द्रीय सदस्यहरू छन् । बैठकमा उपसभापति धनराज गुरुङ, महामन्त्री गगन थापा, सहमहामन्त्रीहरू बद्री पाण्डे र जीवन परियारलगायत केन्द्रीय सदस्यहरू उपस्थित हुनेछन् ।