शेखर पक्षले भन्यो- सभापति देउवा विधानभन्दा माथि रहन सक्दैनन्

काठमाडौं । नेपाली कांग्रेस केन्द्रीय समितिको बैठक शुक्रवार बस्दै छ । सभापति शेरबहादुर देउवाले स्थानीय निर्वाचनमा सत्ता गठबन्धनमा रहेका दलहरूसँग चुनावी तालमेल गर्ने प्रस्ताव केन्द्रीय समिति बैठकमा लैजाने तयारी गरेका छन् ।

चुनावी तालमेलबारे पार्टीमा सहमति नबने बहुमतबाटै भए पनि निर्णय लिने तयारी देउवाले गरेपछि देउवा इतर पक्ष संशकित बनेको छ ।

स्थानीय निर्वाचनमा चुनावी तालमेलको विपक्षमा रहेको डा. शेखर कोइराला नेतृत्वको समूहले ‘सभापति देउवा विधानभन्दा माथि रहन नसक्ने’ निष्कर्ष निकालेको छ ।

कोइराला समूहका नेताहरूको कमलपोखरीस्थित एक होटेलमा बुधबार बसेको बैठकले देउवाको कार्यशैलीको आलोचना समेत गरेको छ ।

बैठकको सुरुमा नेता कोइरालाले पार्टीलाई विधान अनुसार चलाउन नेतृत्वलाई सहयोग गर्न तयार भए पनि नेतृत्वले विधान र पद्धतिलाई बेवास्ता गरेको बताए ।

सभापति देउवाले विगतमा संवादसमेत गर्न नचाहेको प्रसङ्ग कोट्याउँदै कोइरालाले बुधबार बिहान देउवासँग भएको टेलिफोन संवादबारे सविस्तार सुनाएका थिए ।

केन्द्रीय समितिको बैठकमा कसरी प्रस्तुत हुने ? भन्नेबारे कोइरालाले पदाधिकारी तथा केन्द्रीय सदस्यहरूसँग राय मागेका थिए । सभापति देउवासँग केन्द्रीय समिति बैठकअघि भेट हुने सम्भावना रहेको भन्दै कोइरालाले सैद्धान्तिक सुझाव दिनसमेत आग्रह गरेका थिए । बैठकमा अधिकांश नेताहरूले पार्टीभित्र बहुमतको बलमा विधान मिच्ने प्रयत्न भए विद्रोह गर्नुपर्नेमा जोड दिए ।

‘१४ औँ महाधिवेशनमा सभापतिमा उहाँलाई मत नदिएकै कारण सबै तहका साथीहरूमाथि निषेध गर्न थालिएको छ । यो क्रम जारी रह्यो भने टिकट वितरणमा पनि अन्याय हुने निश्चित छ । अन्यायविरुद्ध विद्रोह गर्ने हिम्मत गर्नुपर्छ’, एक नेताले बैठकमा भने ।

बैठकमा केही नेताहरूले केन्द्रीय सदस्य मनोनयन, कार्यसम्पादन समिति गठन, भ्रातृ संस्थाको अध्यक्ष चयन लगायतमा एकलौटी गरिएको भन्दै सम्मानजनक हैसियतका लागि सशक्त प्रतिवाद गर्नुपर्नेमा जोड दिएका थिए ।

भ्रातृ संस्था गठनमा परामर्श गर्ने आश्वासन दिए पनि सभापतिले एकलौटी ढङ्गले नेविसंघ र तरुण दलमा अध्यक्ष तोकेको प्रसङ्ग पनि बैठकमा उठेको छ । ‘हाम्रो बैठक चल्दै गर्दा सभापतिले नै शेखर दाई र महामन्त्रीज्यूलाई फोन गरेर भ्रातृसंस्थाबारे सल्ला गर्छु भन्नुभयो तर बैठक नसकिँदै बिना परामर्श अध्यक्ष तोकियो । व्यक्तिमा भन्दा निर्णय प्रक्रियामा हाम्रो आपत्ति छ’, बैठकमा सहभागी एक केन्द्रीय सदस्यले भने ।

बैठकले कांग्रेसको विधानले दिएबाहेकको क्षेत्राधिकारमा केन्द्रीय समिति प्रवेश गर्न नहुने निष्कर्षसमेत निकालेको छ । ‘विधानले नै केन्द्रीय संसदीय समितिले महानगरकोमात्रै उम्मेदवार तोक्ने व्यवस्था गरेको छ । संघीयतामैत्री विधान लागु गरेर हामीले प्रदेश, जिल्ला र स्थानीय तहमा पार्टीको समिति बनाएका छौँ । सबै निर्णय केन्द्रले गर्ने भए यत्ति धेरै संरचनाको के अर्थ ?’, बैठकमा एक नेताले भने । ती नेताले ६ वटा महानगरबाहेक अन्य स्थानीय तहमा प्रतिशतका आधारमा गठबन्धनमा भागबन्डा हुन नसक्ने बताए ।

‘केन्द्रबाट महानगरभन्दा अन्य तहबारे भागबन्डा वा टिकट केहीको पनि निर्णय लिन पाइँदैन । त्यस्तो निर्णय गर्न खोजिए फरक मत राख्नुपर्छ’, ती नेताको भनाई थियो ।

बैठकमा कम्युनिस्ट पार्टीहरूसँग चुनावी तालमेलको पक्षमा कार्यकर्ता जनता नभएको ठहरसमेत गरेको छ । यद्यपि कार्यकर्ता र जनताको आवाज नसुनी नेतृत्वले सौदा बाजी गर्न खोजेको आरोप शेखर पक्षको छ ।

‘पार्टीभित्रका नेता कार्यकर्ताको भनाई नसुन्ने तर अरू पार्टीसँग सौदा बाजी गर्ने प्रवृत्ति देखिएको छ । लाखौँ कार्यकर्ता तालमेलको विरुद्धमा हुँदा पनि गठबन्धनलाई सभापतिले किन आश्वासन दिनुभयो ?’, एक केन्द्रीय सदस्यले बैठकमा भने ।

बैठकमा सहभागी नेताहरूले स्थानीय तहको उम्मेदवार छनोटमा विधानको व्यवस्था कार्यान्वयन हुनेमा शंका समेत व्यक्त गरे । ‘क्षेत्र, जिल्ला र प्रदेशमा पनि संसदीय समिति छ । तर केन्द्रमा कोसँग नजिक छ भन्ने आधारमा तलसम्मै एक पक्षलाई बाइपास गर्ने सम्भावना बढी छ’, अधिकांश नेताहरूको भनाई छ ।

बैठकले सभापति देउवालाई भेटेरै विधान अनुसार चल्ने र पार्टीभित्रको आन्तरिक एकतालाई नखलबल्याउन खबरदारी गर्ने निर्णयसमेत गरेको छ ।