पल शाह धरौटीमा छुट्लान् ? आज आदेश आउन सक्ने

काठमाडौं । एक नाबालिग गायिकामाथि बलात्कार आरोपमा पक्राउ परेका नायक पल शाहको अहिले तनहुँ जिल्ला अदालतमा थुनछेक बहस भइरहेको छ ।

मतियारकारूपमा पक्राउ परेका उनका म्यानेजर कृष्ण जोशीका कानून व्यवसायीले पनि बहस गरेका छन् । तनहुँ जिल्ला अदालतका श्रेस्तेदार मिनबहादुर कुँवरले शाहका ७ जना कानून व्यवसायीले बहस गरिसकेको बताए ।

‘ अहिले प्रतिवादीका तर्फबाट कानून व्यवसायीले बहस गरिरहेका छन् । अझै तीन-चार जना कानून व्यवसायीले पालो पाउन बाँकी छ। उहाँहरुले सकेपछि जाहेरवालाका कानुन व्यवशायीले पनि केही समय लिन सक्छन्’, कुँवरले भने ।

यसअघि बुधबार जाहेरवालाका तर्फबाट ७ जनाले बहस गरेका थिए । कुँवरले बेलुकासम्म आदेश आउन सक्ने बताए । ‘कम्तीमा आज बहस सकिन्छ । आदेश चाहीँ भन्न सकिन्न’, उनले भने ।

आज तनहुँ जिल्ला अदालतका एक नम्बर न्यायाधीश हरिषचन्द्र ढुंगानाको इजलासमा थुनछेक बहस भइरहेको छ । पीडितले दिएको जाहेरीका आधारमा जिल्ला सरकारी वकिल कार्यालयले शाहविरुद्ध १४ वर्ष कैद सजाय माग गर्दै अदालतमा अभियोग पत्र दर्ता गरेको थियो ।