कक्षाकोठा अभावमा खुला चौरमा पढ्न बाध्य जुम्लाका विद्यार्थी

जुम्ला । जुम्लाको कनकासुन्दरी गाउँपालिका–३ गौरीगाउँमा रहेको नवदुर्गा आधारभूत विद्यालयका विद्यार्थी खुला चौरमा पढ्न बाध्य भएका छन् । विद्यालयमा कक्षा कोठा नहुँदा विद्यार्थीहरू चौरमै बसेर पढ्न बाध्य भएका हुन् ।

उनीहरू हिउँदको कठ्याग्रिँदो जाडोमा समेत चौरमै बसेर पढिरहेका हुन्थे । विद्यालयमा दुई कोठे तीनवटा भवन रहेपनि भएका भवनसमेत निकै जीर्ण र बस्न लायक नभएका कारण बालबालीका खुला चौरमा बसेर पढ्न बाध्य हुन परेको छ ।

विद्यार्थीहरूलाई बस्नको लागि पर्याप्त कक्षा कोठा नभएकाले शैक्षिक सामाग्रीको प्रयोग गरेर शिक्षण गर्न कठिनाइ भएको विद्यालयका प्राधानाध्यापक हरीबहादुर बुढाले बताए ।

भवन नहुँदा विद्यार्थीको गुणस्तर र सिकाई उपलब्धिमा समेत प्रत्यक्ष असर परेको उनको भनाइ छ । विद्यालयमा तीन देखि १२ वर्ष सम्मका विद्यार्थी आउने गरेका छन् ।

कक्षा कोठा नहुँदा बिहान १० बजेदेखि अपरान्ह ४ बजेसम्म खुला चौरमा बस्न बाध्य हुन परेको कक्ष ५ मा अध्ययनरत निराजन बुढाले बताए ।

उक्त विद्यालयमा ४० घरपरिवारका विद्यार्थीले अध्ययन गर्छन् । विद्यालय व्यवस्थापन समितिका अध्यक्ष हर्क बुढाले विद्यालयको अवस्था हेरेर कतिपय अभिभावकले विद्यार्थीलाई निजी विद्यालयमा पढ्न पठाउने गरेको बताए ।

अधिकांस अभिभावकको चासो निजी विद्यालय तिर गएकोले सरकारी विद्यालयको अवस्था निकै जीर्ण हुँदै गएको हो ।