डडेल्धुरामा मोबाइलबाट फाेन गर्न रुख चढ्नुपर्ने बाध्यता

डडेल्धुरा । डडेल्धुराकाे परशुराम नगरपालिकाको भौगोलिक रूपमा बिकट र दुर्गम क्षेत्रका बासिन्दा सञ्चार सुविधाबाट बञ्चित रहेका छन् । अझै पनि मोबाइलमा कुरा गर्न उनीहरु अग्लो स्थान खोज्दै धाउनुपर्ने बाध्यता छ ।

पटक पटक सरोकारवालालाई समस्या दर्साउँदा पनि सामाधान नभएको स्थानीयवासीको गुनासो छ । वर्षौँदेखिको नेटवर्क समस्या यथावत् रहेको पीडा उनीहरुसँग रहेको छ । डडेलधुराकाे परशुराम नगरपालिका र आलिताल गाउँपालिकाका ग्रामीण क्षेत्रमा हालसम्म पनि टावरका कारण नेटवर्कमा समस्या आइरहन्छ ।

दिउँसो पनि नेटवर्कले काम नगर्दा टावर खोज्न अग्लो स्थान वा रुखमा चढ्नुपर्ने बाध्यता रहेको परशुराम-२ का स्थानीयवासी राज बोहराले जानकारी दिए ।  स्थानीयवासीहरु मोबाइलमा कुरा गर्नका लागि अग्लो स्थान र रुख चढ्ने गरेका छन् । महत्वपूर्ण सूचना आदानप्रदानका साथै स्वदेश तथा विदेशमा रहेका आफन्तसँग कुराकानी गर्न टावरले टिप्ने ठाउँ खोज्दै रुखमा चढ्ने गरेको उनको भनाइ छ ।

सडक यातायात, केन्द्रीय प्रसारण लाइनको विद्युत्को सुविधा नपुगेको दुर्गम क्षेत्रमा टेलिकमले जडान गरेको भिस्याट प्रविधिको टेलिफोन प्रयोगविहीन छ । एक मिनेट फोनमा कुरा  गर्नलाई घण्टौ  हिँडेर सम्बन्धित व्यक्तिसँग कुरा गर्नुपर्ने बाध्यता कायमै छ । सुगम स्थानमा दिनहुँजसो आफन्तसँग कुराकानी भइरहने भए पनि भित्री मधेसका ग्रामीण क्षेत्रका मानिस भने आफन्तसँग कुरा गर्न टावरको पर्खाइमा रहेका छन् ।

परशुरामका तोली, अन्तोली वसुन, बजाडी, जमरा, गोगन, सुर्खाल, पोख्ना सर्गै आलिताल गाउँपालिकाका दुर्गम बस्तीमा समेत नेटवर्क समस्या रहेको छ ।  जिल्लाका अन्य पालिकाका लेकाली बस्ती र टाढाका गाउँमा नेटवर्क समस्या वर्षौंदेखि यथावत रहेको छ । हातहातमा मोबाइल छन् तर टावर नहुँदा समस्या छ । नेपाल टेलिकमको नेटवर्क त नजिककै गाउँमा पनि टिप्न मुस्किल हुन्छ परशुराम कृष्णाका खगेन्द्र कामीले जानकारी दिए ।

जिल्लाका विभिन्न स्थानमा नेपाल टेलिकमको नेटवर्क टावरको सङ्ख्या कम हुनु र विस्तारमा ढिलासुस्तीका कारण दुर्गम गाउँका मानिसले प्रविधिको प्रयोगबाट वञ्चित हुनुपरेको स्थानीयवासीको दाबी छ । महँगो खालका मोबाइल सेट गाउँमा पुगेका भए पनि नेटवर्क र टावर नहुँदा आफूहरुले कर मात्रै तिर्नुपरेको भित्री मधेस मलास क्षेत्रका युवा प्रमोद बोहराले बताए  ।

नेटवर्कले मात्रै काम नगर्दा धेरै युवा रोजगारमूलक सूचना प्राप्त गर्नबाट वञ्चित रहेका छन् भने कतिपय किसान राहतका साथै सरकारी अनुदानका सूचना नपाउँदा समस्या भोगिरहेका स्थानीयवासी चूडामणि पनेरुले बताए । दुर्गम गाउँको बसाई त्यसमा पनि प्रविधिको पहुँचमा नपुग्नाले धेरै सरकारी सेवासुविधाबाट पनि टाढा हुनपरेको र समयमा सूचना पनि प्राप्त नहुने उनको भनाइ छ ।

स्थानीय निर्वाचनमा पनि दुर्गम बस्तीमा टावर र वाइफाइको सुविधा पुर्याउने जनप्रतिनिधिलाई सहयोग गर्ने स्थानीयको भनाइ छ । आपुहरु सामान्य सूचनाको पहुँचबाट पनि टाढा भएका कारण यसपालि स्थानीय तहको निर्वाचनमा सो सुविधा पुर्याउन सक्ने जनप्रतिनिधिलाई छान्ने यहाँको युवाको दाबी छ । परशुराम नगरपालिकाका प्रमुख भीमबहादुर साउदले सबै क्षेत्रका लागि टावरको माग भएको र चाँडै विस्तार गरी सुविधा सम्पन्न नेटवर्कसहित वाइफाइ विस्तार गरिने बताए ।