माधव नेपाल भन्छन्- हामी तीन प्रदेशमा एमालेभन्दा अगाडि, केपी ओली बिचराको बेहाल छ (भिडिओ)

काठमाडौं । नेकपा (एकीकृत समाजवादी) का अध्यक्ष माधवकुमार नेपालले आफ्नो पार्टी सशक्तरूपमा अगाडि बढिरहेको बताएका छन् । उनले स्थापनाकालमै आफ्नो पार्टी सुदूरपश्चिम, मधेस प्रदेश र कर्णाली प्रदेशमा एमालेभन्दा अगाडि रहेको बताए ।

‘सुदूरपश्चिममा त हाम्रो पार्टी एक नम्बरमा छ । केपी ओलीको पार्टी भुइँमा पछारिएको छ,’ पार्टीनिकट मुस्लिम इत्तेहाद संगठनको भेलामा सम्बोधन गर्दै उनले भने,‘माओवादी २ नम्बर, कांग्रेस ३ नम्बर, केपी ओली बिचरा बेहाल !’

त्यसैगरी मधेस प्रदेशमा पनि नेकपा (एस) भन्दा एमाले धेरै पछाडि परेको उनले दाबी गरे । उनले भने, ‘दुई नम्बर प्रदेशमा हामी सशक्त भएर अगाडि छौं । केपी ओलीको पार्टी त कहाँ हो कहाँ ।’

कर्णाली प्रदेशको विषयमा बोल्दै उनले भने,‘कर्णाली प्रदेशमा पनि हाम्रो पार्टी अगाडि सशक्त ढंगबाट अगाडि बढिरहेको छ, एमाले पछारिएर अर्धबेहोस अवस्थामा छ ।’

जिल्लाहरूको विषयमा बोल्दै उनले आफ्नो पार्टी अधिकांश जिल्लामा एमालेभन्दा अगाडि रहेर सशक्त ढंगले संगठित भएर अघि बढिरहेको बताए ।