केन्द्रीय समिति लगत्तै कांग्रेस कार्यालयमा ‘हाइ कमाण्ड’ को बैठक

काठमाडौं । नेपाली कांग्रेसको केन्द्रीय समिति बैठकको बहुमत चुनावी गठबन्धनको पक्षमा उभिएपछि सभापति शेरबहादुर देउवासहित हाइ कमाण्डको बैठक बसेको छ ।

केन्द्रीय कार्य समिति बैठक मंगलबारसम्म स्थगित गरेलगत्तै हाइ कमाण्ड बसेको हो । बैठकमा सभापति देउवा र वरिष्ठ नेता रामचन्द्र पौडेलसहित उपसभापति पूर्णबहादुर खड्का, धनराज गुरुङ, महामन्त्री विश्वप्रकाश शर्मा, गगन थापा, पूर्वमहामन्त्री डा. शशांक कोइराला र शेखर कोइराला सहभागी थिए ।

कांग्रेसको भोलि बस्ने बैठकले गठबन्धनको पक्षमा सैद्धान्तिक निर्णयसहित प्रस्ताव पारित गर्ने प्रवक्ता डा. प्रकाशशरण महतले बताएका छन् । त्यसबारे छलफल गर्न देउवाले गठबन्धन पक्षधर र विपक्षमा रहेका शीर्ष नेताहरूसँग छलफल गरेका हुन् ।

बैठक संसदीय समिति गठनको विषयमा केन्द्रित रहेको छ । समितिमा को को नेता रहने भन्नेबारे समझदारी जुटाउन देउवा सक्रिय छन् ।