कांग्रेस बैठकअघि पदाधिकारीसँग छलफलमा देउवा

काठमाडौं । नेपाली कांग्रेस केन्द्रीय समिति बैठकको चौथो तथा अन्तिम दिनको बैठक सुरू हुनुअघि पदाधिकारीहरू छलफलमा जुटेका छन् । केन्द्रीय समितिको निर्णय र आगामी रणनीतिबारे देउवाले पदाधिकारीसँग परामर्श गरेका हुन् ।

कांग्रेसले संसदीय समिति पनि बनाउँदै छ । समितिमा को को नेता रहने भन्नेबारे समझदारी जुटाउन देउवा सक्रिय छन् ।

नेपाली कांग्रेसको केन्द्रीय समिति बैठकको बहुमत पक्ष चुनावी गठबन्धनको पक्षमा छ । हिजो साँझ पनि बैठक सकेर कांग्रेस ‘हाइ कमाण्ड’ बसेको थियो ।

कांग्रेसले गठबन्धनको पक्षमा सैद्धान्तिक निर्णयसहित प्रस्ताव पारित गर्दैछ । कांग्रेसमा शीर्ष नेताहरू गठबन्धनको पक्ष-विपक्ष दुवै धारमा उत्रिएका छन् ।

देशका सबै स्थानीय तहमा एक्लै निर्वाचन लडेर बहुमत स्थानीय तहको नेतृत्व गर्न सक्षम भए पनि गठबन्धन सरकारमा रहेका दलहरूबीचको सहकार्यलाई निरन्तरता दिन ‘आवश्यक स्थानीय तहमा तालमेल गर्ने’ निर्णयको तयारीमा कांग्रेस रहेको छ ।